Statlege nettstader best ut i kvalitetsvurdering

Statlege nettstader kjem betre ut enn andre offentlege nettstader i den årlege kvalitetsvurderinga frå Noreg.no. Resultatet av vurderinga viser store variasjonar i kvaliteten, og samla sett skårar offentlege nettstader framleis lågt på viktige område som tilgjengelegheit og elektroniske tenester.

692 offentlege nettstader er vurderte ut frå krav til tilgjengelegheit, brukartilpassing og nyttig innhald. Kun 4 prosent av dei kommunale og 15 prosent av dei statlege nettstadene oppnår 80prosent eller meir av total poengsum på tilgjengelegheit. Men det er store variasjonar mellom nettstadene. Nokre har ei tydeleg satsing på tilgjengelegheit, bla. Sørum kommune som i år skårar full pott på dette området.

Resultatet viser også at det offentlege framleis har mykje ugjort i å leggje til rette for elektroniske tenester og brukarmedverknad. Til dømes tilbyr under 15 prosent av dei 692 nettstadene elektroniske høyringar i enkel eller avansert form. Statlege nettstader skårar lågare enn kommunale nettstader på innsyn og digital medverknad, medan mange kommunar framleis manglar tilbod om personlege sjølvbeteningstenester. For innbyggjarane er det altså eit stykke att før offentleg forvaltning er tilgjengeleg slik dei ønskjer – sjølvbetent og open på Internett.

Sjå resultata frå årets kvalitetsvurdering hos Noreg.no

Noreg.no har sidan 2004 gjennomført årlege kvalitetsvurderingar av offentlege nettstader. I 2007 er 692 nettstader vurderte. Av desse er 246 statlege og 446 kommunale/fylkeskommunale. Kriteriesettet er i år revidert,og krava til nettstadene er skjerpa. Resultatet av vurderinga kan difor ikkje samanliknast med resultatet frå tidlegare år. Kvalitetsvurderinga er gjennomført av Noreg.no, i samarbeid med Vestlandsforsking og Aletheia kommunikasjon.

Noreg.no er den offentlege vegvisaren til informasjon og tenester, og ansvarleg for innbyggjarportalen Miside. Verksemda ligg under Fornyings- og administrasjonsdepartementet. Frå 01.01.08 vert Noreg.no del av Direktoratet for forvaltning og IKT (DIFI).

Kontaktperson: Trude Risnes, noreg.no, mob. 91 57 57 26