Stor interesse for å delta i ”Saman om ein betre kommune”

Utviklingsprogrammet Saman om ein betre kommune skal støtte lokale tiltak retta mot redusert sjukefråvere, mindre ufrivillig deltid, styrka kompetanse og betre omdømme. Om lag 100 kommunar har søkt om å få delta i programmet.

Dei fleste av kommunane ønskjer å arbeide med fleire av programmet sine tema. Det er flest prosjekt retta inn mot å redusere sjukefråvere og å redusere uønska deltid. 

• Kommunar som har søkt om å få delta [ Excel ] [ ODS ].

- Eg er svært glad for at så mange kommunar ønskjer å delta i programmet. Det syner at kommunane er opptekne av å skape endå betre tenester til innbyggjarane sine, seier kommunal- og regionalminister Liv Signe Navarsete.

- Prosjekta er tufta på samarbeid mellom tilsette, leiarar og politikarar. Slike samarbeid meiner eg gir eit godt grunnlag for å finne fram til dei beste løysingane, seier Navarsete.

Programmet som startar opp i andre halvdel av 2011 er eit samarbeid mellom Kommunal- og regionaldepartementet, KS og forhandlingssamanslutningane på arbeidstakarsida. Eit hovudmål er å stimulere lokale prosjekt, mellom anna ved at  deltakarkommunane får fagleg rettleiing, høve til å delta i nettverksarbeid og noko økonomisk støtte til prosjektarbeidet. Resultata frå deltakarkommunane sitt arbeid skal systematiserast og formidlast slik at erfaringane kan komme alle kommunar til gode.

- Vi skal no gå gjennom søknadane og velje ut dei kommunane som får delta i dette programmet. Vi kan ikkje ta med alle dei 100 kommunane og det blir ein krevjande jobb å velje blant så mange interessante prosjekt, seier Liv Signe Navarsete.

• Saman om ein betre kommune.

Kommunal- og regionaldepartementet sin pressetelefon: 22 24 25 00.