Velkommen til bords

Landbruks- og matminister Lars Peder Brekk har hatt seks åpne møter rundt omkring i landet for å presentere den nye meldinga til Stortinget om landbruks- og matpolitikken, og få innspel og kommentarar.  Han avrunda møteserien i Arendal.  Dette siste møtet var for Vest-Agder, Aust-Agder og Telemark. Interessa og frammøtet har vore stort heile vegen. I Arendal benka om lag 250 personar seg til landbrukspolitisk debatt.

• Les hele talen til landbruks- og matminister Lars Peder Brekk

– Dette har vore ein god og nyttig møterunde, - og skikkeleg morro, seier landbruks- og matminister Lars Peder Brekk. - Landbruket og bøndene har ein eineståande kultur og tradisjon for å samlast til slike ordskifte og orienteringar. Eg tykkjer meldinga i det store og heile har blitt svært godt motteke, seier Brekk.

Eigedomspolitikken i landbruket
På møtet i Arendal la Brekk spesiell vekt på trongen for nyorientering av delar av eigedomspolitikken i landbruket. – Kva gjer vi med alle dei små gardane som ikkje lenger har så stor interesse i samband med landbruksdrift, men som kan vere svært attraktive både som bustad og til fritidsbruk? spurde han.

- Det handlar om å få folk og liv på langt fleire av dei 33.000 landbrukseigedomane som i dag er utan fast busetnad. Og det handlar om langt meir. Det handlar om å kome meir i møte alle dei som ønskjer å ta del i bygde-Norge sine verdiar og tradisjonar. Som ønskjer seg mer plass, som gjerne vil ha meir enn ei tomt, men mindre enn et gardsbruk, sier Brekk. -  Vi må få dei to køene til å møtast betre;  køa av alle dei som ønskjer seg ein livsstilseigedom. Og køa av alle bygdene som ønskjer seg fleire menneske og ny aktivitet. Målet må vere å  skape en vinn-vinn situasjon der langt fleire får realisere det livet dei ønskjer, og der bygde-Norge samstundes får meir liv og aktivitet, idear og kapital, seier landbruks- og matminister Lars Peder Brekk.

Fleire møte
Med dette er den planlagte møteserien gjennomført, men i tida framover kjem Brekk til å vere tilstades på fleire møter der Landbruks- og matmeldinga står på dagsordenen. Den 30. januar er han i Rogaland. Han skal gjeste Oppdal den 13. februar og Lofoten den 14. februar.