Måndag 12. april vitjar miljø- og utviklingsminister Erik Solheim og riksantikvar Jørn Holme Odda. Pressa er invitert til å dekke vitjinga.

Føremålet er å bli betre kjent med den gamle industristaden Odda og Tyssedal. Gjenbruk av smelteverkstomta i Odda sentrum har vore debattert sidan konkursen i 2003. Delar av smelteverket er midlertidig freda, og Odda-Tyssedal-området skal også vurderast som verdsarv. Solheim skal også vitje eit av dei ti prioriterte teknisk-industrielle kulturminna, Tyssedal kraftstasjon og Norsk Vasskraft- og Industristadsmuseum.

Solheim og Holme kjem til Odda med helikopter klokka 0930. Odda kommune har tilbode helikopterskyss for at vitjinga skal kunne vare lengst mogleg. Dei vil få omvisning på smelteverkstomta klokka 0945. Den vil vare i om lag 90 minutt. Solheim og Holme skal etter det ha møter med politisk og administrativ leiing i Odda kommune.

Klokka 1330 opnar Erik Solheim ei utstilling i Tyssedal i samband med at staden som den fyrste industriarvstaden får status som ankerpunkt i European Route of Industrial Heritage. Dette er eit informasjonsnettverk for turisme som viser industriarv i 32 europeiske land. Av til saman 850 industriarvstader fins det 72 ankerpunkt. Utstillinga viser bilete frå andre stader på industriarvlista.

Pressekontakt for Erik Solheim er kommunikasjonssjef Jon Berg, tlf 90569495