Flaum og skred

Som vassdragsmyndigheit er Energidepartementet (ED) ansvarleg for forvaltning av vassressursane i landet og har det statlege forvaltningsansvaret for flaum og skred.

Hovudkontoret til Noregs vassdrags- og energidirektorat (NVE) på Majorstua i Oslo.
Hovudkontoret til Noregs vassdrags- og energidirektorat (NVE) på Majorstua i Oslo. Foto: NVE

Flaum og skred er naturlege prosessar, men kan føre til skadar på bygg, infrastruktur, jordbruk, miljø og i verste fall tap av menneskeliv.

Energidepartementet har det statlege forvaltningsansvaret for flaum og skred, men det operative ansvaret er delegert til Noregs vassdrags- og energidirektorat (NVE). NVE hjelper og rettleier kommunane og samfunnet elles i arbeidet med å førebyggje skadar frå flaum og skred. NVE skal bidra til å førebyggje skadar frå flaum og skred på følgjande område: kartlegging, arealplanlegging, sikring, overvaking/varsling og beredskap.

Kartlegging av fare og rett arealplanlegging er viktig for å førebyggje skadar. NVE hjelper kommunane mellom anna gjennom flaumsone- og skredfarekartlegging. Informasjon om kartlagd flaum- eller skredfare er tilgjengeleg på NVEs nettsider og i ulike digitale kartløysingar. NVE gir også kommunar råd og rettleiing til arealplanar.

For eksisterande busetnad kan NVE gi bistand til planlegging og gjennomføring av fysiske sikringstiltak.

NVEs flaumvarslingsteneste gir informasjon til kommunar og andre om kommande flaumsituasjonar. I tillegg blir det varsla om jordskred og snøskred. NVE overvaker og varslar også om fjellskred. Les meir på varsom.no - ei varslingsteneste levert av NVE i samarbeid med Meteorologisk institutt og Statens vegvesen.

NVEs fem regionkontor kan hjelpe det lokale og regionale beredskapsapparatet i ein beredskapssituasjon.