100 millionar ekstra til barn og unge i idretten

– No er det fleire familiar enn før som slit med å betale kontingent og utstyr. Over heile landet tilbyr idretten verdifulle fellesskap. Vi vil at flest mogleg skal få moglegheita til å oppleve både meistring, helse og tilhøyregheit. Derfor bidreg vi no ekstra på denne måten, seier kultur- og likestillingsminister Lubna Jaffery.

Nesten alle barn og unge er innom idretten i oppveksten, men 1 av 3 barn frå låginntektsfamiliar deltek ikkje i faste fritidsaktivitetar. Regjeringa ønsker å hindre at forskjellane aukar.

– Dette er det viktigaste vi jobbar med. Vi vil at barn skal ha like vilkår – uavhengig av foreldra sin økonomi. Mange gjer allereie mykje godt arbeid, men vi ønsker å gi idrettslaga ekstra hjelp til å gjere det dei kan for å inkludere enda fleire, seier Jaffery.

No foreslår regjeringa at 100 millionar kroner blir fordelt via Norges idrettsforbund til lag og foreiningar i dei områda som har ein stor andel barn i familiar med vedvarande låginntekt. 

Regjeringa jobbar også med ein handlingsplan for å få kostnadane ned og deltakinga opp i både idrett, friluftsliv og kultur. Planen skal vere klar før sommaren 2024.

Samtidig satsar regjeringa på breie og enkle støtteordningar som full momskompensasjon for frivilligheita. Også ved tildelinga av spelemidla i mai vart det satt av 125 millionar kroner ekstra til deltaking for barn og unge.

Fordeling av midlane:

	90 mill. kroner	10 mill. kroner	Samlet fordeling
Viken	25 009 507	1 086 793	26 096 300
Oslo	22 978 611	0	22 978 611
Vestfold og Telemark	9 939 224	448 115	10 387 339
Vestland	7 177 838	1 128 948	8 306 786
Agder	6 711 138	812 496	7 523 634
Rogaland	6 065 345	393 255	6 458 600
Innlandet	4 642 305	1 652 711	6 295 016
Trøndelag	4 076 795	1 148 005	5 224 800
Møre og Romsdal	1 454 799	1 145 118	2 599 917
Nordland	861 940	1 252 526	2 114 466
Troms og Finnmark	1 082 498	932 033	2 014 531
	90 000 000	10 000 000	100 000 000