Regjeringa har i dag tilsett Thomas Laurendz Bornø som ny leiar av Trygderetten.

– Eg er glad for at Bornø har takka ja til stillinga som leiar av Trygderetten. Han har solid juridisk kompetanse, brei leiarerfaring og god innsikt i forvaltninga. Dette er viktig for å vidareutvikle Trygderetten som ein effektiv og tillitsskapande rettsinstans, seier arbeids- og inkluderingsminister Kjersti Stenseng.

Trygderetten er ein uavhengig, domstolliknande instans som behandlar klager på vedtak etter folketrygdlova og fleire andre velferdslover. Trygderetten spelar ei sentral rolle for rettstryggleiken til innbyggjarane.

Ny leiar av Trygderetten

1 / 4
Thomas Laurendz Bornø er innstilt som ny leiar av Trygderetten. Her på bilete saman med arbeids- og inkluderingsminister Kjersti Stenseng.
2 / 4
Thomas Laurendz Bornø er innstilt som ny leiar av Trygderetten
3 / 4
Thomas Laurendz Bornø er innstilt som ny leiar av Trygderetten. Her på bilete saman med arbeids- og inkluderingsminister Kjersti Stenseng.
4 / 4
Portrett av Thomas Laurendz Bornø

Ser fram til å ta fatt på oppgåva

– Eg er stolt over å få tillit til å leie Trygderetten. Verksemda har ei viktig samfunnsrolle, og eg ser fram til å arbeide saman med dyktige medarbeidarar for å sikre høg kvalitet, god saksavvikling og styrkt tillit, seier Bornø.

Thomas Laurendz Bornø er utdanna jurist. I dag er han utviklingsdirektør i Kommunal- og distriktsdepartementet. Tidlegare har han mellom anna vore direktør for Husleigetvistutvalet og assisterande direktør for Statens sivilrettsforvaltning.

Det er ikkje avklart når Bornø tiltrer stillinga.