Berekraftig norsk fiskeriforvaltning

- Situasjonen i norske farvatn er oppløftande. Bestanden av norsk arktisk torsk er i god stand. Og når vi i tillegg har sett i verk tiltak for å bygge opp kysttorskebestandane kan alle trygt kjøpe og ete norskfanga torsk, sa fiskeri- og kystminister Helga Pedersen i  innlegget sitt på seminaret ”Norsk forvaltning av torskefiskeria” i Stockholm i regi av Eksportutvalet for fisk.

- Berekraftig forvaltning av dei marine ressursane våre er leietråden for arbeidet mitt som statsråd for fiskeri- og havbruksnæringa i Noreg. Ei berekraftig forvaltning i fiskeria handlar om eit heilheitsperspektiv, om å sikre verdiskaping, om sysselsetting og om at dei norske kystsamfunna skal vere attraktive og levedyktige også i framtida, sa fiskeri- og kystminister Helga Pedersen.

Kampen mot svartfisket er ein sentral del av regjeringa sitt arbeid for å sikre ei berekraftig forvaltning av fiskeressursane. I den nye havressurslova vår har vi styrka reglane om ressurskontroll, og då særleg reglane for tiltak mot ulovleg fiske. Dette gjeld blant anna sporing og merking av fisk og regulering av omlasting av fiskefangstar til havs. Dette vil stille nye krav til næringsaktørane om å ta eit sjølvstendig ansvar for å sikre dokumentasjon for at produkta dei handlar med, er lovleg fanga.

Fiskeri- og kystministeren skal under besøket i Stockholm også møte sin svenske kollega, jordbruksminister Eskil Erlandsson til politiske samtaler.