Satsing på opera og musikk i Hordaland

I statsbudsjettet for 2009 foreslår regjeringa å auke tilskotet til Den Nye Opera med 5,5 millionar til vel 12,3 millionar kroner. I dette tilskotet er det lagt inn 2,2 millionar kroner til vidareføring av Ad Opera-prosjektet, som til no har fått støtte frå Norsk kulturråd.  

- Vi har med glede merka oss den høge kvaliteten i produksjonane til Den Nye Opera. Departementet legg til grunn at den regionale fordelinga av tilskot til Den Nye Opera blir avklart, seier kultur- og kyrkjeminister Trond Giske.

Musikksatsinga gjeld også Bergen Filharmoniske orkester, som vil få auka tilskotet med 5,3 millionar kroner til om lag 91,5 millionar kroner. Festspillene i Bergen aukar med 1,5 millionar til 17 millionar kroner. BRAK – Bergen Rock Aktører får styrka tilskotet med 0,3 millionar kroner til 1 million kroner, og Ole Bull Akademiet aukar med 0,25 millionar til 3,1 millionar kroner.

Den Nationale Scene får ein auke i tilskotet på 5 millionar til om lag 90,6 millionar kroner. Hordaland Teater aukar tilskotet med 1 million kroner til om lag 8,8 millionar kroner og Bergen Internasjonale Teater (BIT) får ein auke på om lag 2,1 millionar kroner til vel 3,3 millionar. Tilskotet inkluderer støtte til Oktoberdans og Meteor. Denne budsjettauken gir BIT økonomisk grunnlag til å drive forsøk og utvikling i eigen regi.

Museumssenteret i Hordaland får ein auke på om lag 1,4 millionar til om lag 8,2 millionar kroner. I tillegg vil Bergen Kunsthall få styrkt driftstilskotet i 2009 med over 1,1 millionar kroner, slik at samla tilskot vil bli på 4,2 millionar kroner.

Regjeringa foreslår også å løyve 0,5 millionar kroner til Bergen Vitensenter for å frigjere spelemidlar i samband med at Den kulturelle skulesekken skal utvidast til den vidaregåande skulen.

Forslaget til fordeling av midlar til kulturformål i Hordaland over Kultur- og kyrkjedepartementet sitt budsjett for 2009 er slik:                                                                      

 

	Tilskot 2008	Samla auke	Forslag 2009
Brak - Bergen Rock Aktører	700	300	1 000
Ole Bull Akademiet	2 849	251	3 100
Bergen kunsthall	3 063	1 135	4 198
Bergen Filharmoniske Orkester	86 171	5 302	91 473
Festspillene i Bergen	15 530	1 500	17 030
Den Nationale Scene	85 623	5 000	90 623
Carte Blanche	17 753	1 500	19 253
Hordaland Teater	7 787	1 000	8 787
Den Nye Opera (inkl. Ad Opera)	6 820	5 500	12 320
Bergen Internasjonale Teater (BIT) - Teatergarasjen	1 272	2 078	3 350
Museumssent.i Hordaland	6 777	1 398	8 175
Bergen Vitensenter - skolesekkmidler		468	468