Jordbruksinntektene auka åtte prosent i 2010

Jordbruksinntektene auka med om lag 16.400 til kr 227.400 per årsverk frå 2009 til 2010. Det syner dei årlege driftsgranskingane utført av Norsk institutt for landbruksøkonomisk forskning (NILF). Driftsgranskingane omfattar rekneskapstal frå 835 bruk fordelt over heile landet.

• Les innlegget landbruks- og matminister Lars Peder Brekk heldt ved åpninga av seminaret for Driftsgranskingane sin 100-årsmarkering

Auke i jordbruksinntektene
Jordbruksinntektene, her målte som vederlag til arbeid og eigenkapital per årsverk, auka med 8 prosent på landsbasis frå 2009 til 2010. Inntektsnivået i jordbruket var høgast på Jæren med kr 259.900 per årsverk, etterfølgt av Nord-Noreg (kr 245.400) og flatbygdene på Austlandet (kr 244.400).

Viktige årsaker til auken var betre kornavlingar, høgare pris på mjølk, auka tilskot og auka produktivitet. Avlingsauke korn var årsak til inntektsauke på kornbruka. Det var stor variasjon både mellom ulike grupper av produsentar og innan like grupper. Dette er eit av resultata frå dei årlege driftsgranskingane utført av Norsk institutt for landbruksøkonomisk forskning (NILF). Driftsgranskingane omfattar rekneskapstal frå 835 bruk fordelt over heile landet.

• Sjå heile saka om jordbruksinntektene hjå NILF 

Reduksjon i investeringsnivået
Investeringsnivået i jordbruket er nesten halvert frå 2009. Gjennomsnittleg nettoinvestering per bruk var kr 74.400 mot kr 137.200 i 2009. Likevel er det relativt høg investeringsaktivitet samanlikna med gjennomsnitt for siste tiåret. Det vart investert mest i driftsbygningar, og det var høgast nettoinvestering i Trøndelag utanom flatbygdene.

Om NILF
Norsk institutt for landbruksøkonomisk forskning (NILF) er eit frittståande og uavhengig statleg forskningsinstitutt knytta til Landbruks- og matdepartementet. NILF skal vere eit FOU-miljø på høgt fagleg nivå og leiande innen nærings- og føretaksøkonomi i landbruk og industri basert på landbruk.