200 millionar kroner til SIVA

Regjeringa foreslår å løyve 200 millionar kroner til auka innskotskapital i SIVA, øyremerkt eigedomsverksemda. Løyvinga skal medverke til framdrift i planlagde utbyggingsprosjekt.

– Ei styrking av eigenkapitalen til SIVA vil gi framdrift i viktige byggeprosjekt i ei tid med knappare tilgang på kapital frå private investorar og bankar, seier nærings- og handelsminister Sylvia Brustad.

Den auka løyvinga mogleggjer realiseringa av fleire prioriterte prosjekt.

Statsverksemda SIVA utviklar infrastruktur for nyskaping i industriverksemder og forsknings- og kunnskapsparkar i heile landet. Verksemda skal tilretteleggje for sterke regionale verdiskapingsmiljø og nye arbeidsplassar. SIVA har eit særleg ansvar for å medverke til auka vekstkraft i distrikta.

Verksemda arbeidar innan to hovudområde: eigedom og innovasjon. Eigedomsverksemda står for oppføring og utleige av bygg og infrastruktur for industri og nyskapingsmiljø, der den private marknaden ikkje fungerer. Dette skal medverke til å avlaste risiko og kapitalbehov for føretaka. Innovasjonsverksemda driv med ulike program og nettverkstiltak.

SIVA er eigd av Nærings- og handelsdepartementet, og mottek programløyvingar frå  både eigardepartementet og Kommunal- og regionaldepartementet.