Eaktodáhtolaš servviid lassiárvodivatbuhtadus
Artihkal | Maŋimuš ođasmahttojuvvon: 31.05.2022 | Kultur- ja dásseárvodepartemeanta
Ortnega ulbmilin lea ovddidit eaktodáhtolaš doaimmaid. Lassiárvodivatbuhtadusain buhtadit eaktodáhtolaš servviid goluid lassiárvodivadiin dan oktavuođas, go sii ostet gálvvuid ja bálvalusaid, dihto gessosiid maŋŋá. Ruđaid geavaheami ii dárbbaš čilget.
Ulbmiljoavku lea ráddjejuvvon:
- demokráhtalaš, ii-ekonomalaš searvvit
- osko- ja eallinoaidnosearvvit, mat eai gula čuoggái a.
- vuođđudusat vrd. vuođđuduslága § 4 goalmmát lađđasa, go eaktodáhtolaš áŋgiruššan lea mávssolaš oassi vuođđudusa doaimmain.
Ulbmiljoavku ferte maid deavdit eará ohcaneavttuid, vrd. láhkaásahusa eaktodáhtolaš servviid lassiárvodivatbuhtadusa birra (Forskrift om merverdiavgiftskompensasjon for frivillige organisasjoner) (Lovdata).
Ortnega hálddaša Lotteriija- ja vuođđudusgeahčču (Lotteri- og stiftelsestilsynet). Kultur- ja dásseárvodepartemeanta dahká dárkilut mearrádusaid. Lotteriijalávdegoddi (Lotterinemnda) lea ortnega váiddaorgána.
Eaktodáhtolaš searvvit sáddejit ohcamuša ja doarjjaortnet buhtada de lassiárvodivatgoluid dan muddui go guđege jagi juolludeapmi gokčá. Jos juolludeapmi ii govčča visot goluid, de buhtadit prosentuálalaččat seammá ollu buot ohcciide.
2021 ožžo eanet go 22 000 searvvi badjel 1,8 miljárdda kruvnno ortnegis. Vuosttaš háve ortnega álggaheami rájes ožžo buot vuostáiváldit 100 proseantta ohccojuvvon supmis. 2022 ortnegii leat juolludan 1,9 miljárdda kruvnno.
Sihke guovddášdási, guovlludási ja báikkálašdási servviide juolludit ruđa ortnegis. Eanaš doarjagis juolluduvvo báikkálaš servviide. Ruđat addojuvvojit friija geavahussii, eaige ohccit dárbbaš čilget masa daid geavahit.
Lassiárvodivatbuhtadusa evaluerejedje 2012 loahpas. Evalueremis bođii ovdan, ahte ortnegiin fátmmastit olles eaktodáhtolaš suorggi, ja ahte dat lea ovttageardán ja unnán byrokráhtalaš. 2014-2015 Deloitte kártii servviid lassiárvodivatgoluid Kulturdepartemeantta ovddas.
Ođđa láhkaásahus 2019
2019 ásahuvvui eaktodáhtolaš servviid lassiárvodivatbuhtadusa várás ođđa láhkaásahus. Rievdadusat leat leamaš gulaskuddamis, ja ortnega leat háliidan ráhkadit deaivilabbon ja ain ovttageardánabbon. Álkidahtton modeallas leat mudden rehkenastinvuogi. Oppalaččat dat lea ávkin unna searvvážiidda. Rievdadusa hárrái leat gulahallan eaktodáhtolaš surggiin.
Eará mávssolaš rievdadusat leat:
- Buot vuostáiváldit, maiddái vuolit lađđasat ja oasussearvvit, leat geatnegasat registreret iežaset Eaktodáhtolaš servviid registarii.
- Álkidahttojuvvon modeallas leat vuolidan doaibmagoluid vuolimus rájá ovddeš 200 000 kruvnnos 100 000 kruvdnui.
- Dokumenterejuvvon modeallas vuolidit daid lassiárvodivatgoluid vuolimus rája, maid vuođul buhtadusa sáhttá ohcat, 14 000 kruvnnos 7 000 kruvdnui.
- Doaibmagoluid oktasaš rádji lea 5 milj. kruvnno. Jos ohcá buhtadusa stuorát supmi vuođul, de galgá registrerejuvvon dahje stáhtaautoriseren revisor dárkkistit rehketdoalu.
- Doaibmagoluid oktasaš rádji lea 5 milj. kruvnno, ovdalgo gáibiduvvo geasus § 7 vuođul (álkidahtton modeallas).
- Revisorraporta oppalaš ohcamuša hárrái ii šat gáibiduvvo guovddáš dási organisašuvdnalađđasiin iige ovttaskas ohcciin, geat sáddejit ohcamuša oasussearvvi beales, jos daid ollislaš doaibmagolut leat unnibat go 5 miljovnna kruvnno.
- Oasusservviin gáibiduvvo iešdieđáhus, mii duođašta eaktodáhtolaš doaimma.
Ohcanáigemearri lea čakčamánu 1. beaivve. Organisašuvnnain, main leat máŋga organisašuvdnalađđasa, guovddášlađas sádde ohcamuša olles organisašuvnna beales. Guovddášlađđasis lea ovddasvástádus čuovvulit iežas vuolit dási lađđasiid ja fuolahit ahte ohcanvuođus lea doaimmahuvvon revisorraporta ja eará áigeguovdilis duođaštusat.
Jos dus leat jearaldagat ortnega dahje ohcanproseassa birra, sáhtát gulahallat Lotteriija- ja vuođđudusgeahčuin: Telefonguovddážiin: 57 82 80 00 dahje e-poasttain: postmottak@lottstift.no