73 miljovnna juolluduvvo ovttasdoaibmamii miehtá riikka

111 prošeavtta olles riikkkas ožžot oktiibuot 73 miljovnna dearvvašvuođa ovttasdoaibmamii. 66,7 miljovnna juolluduvvo dál, ja reastaruhta fas maŋŋelis dán jagi.  Mii leat hui ilus go ovttasdoaibman dál vuoruhuvvo miehtá riikka. Dát boahtá ávkin divššohasaide, lohká dearvvašvuođa ja fuolahusministtar Anne-Grete Strøm-Erichsen ja gielda- ja guovloministtar Liv Signe Navarsete.

Dán jagi álggahii ráđđehus doarjjaortnega mas gielddat sáhttet ohcat doarjagiid hukset báikkálaš medisiinnalaš guovddážiid ja ovdánahttit dearvvašvuođa- ja fuolahusbálvalusaid ovttasbarggu. Ráđđehus lea várren oktiibuot 73 miljovnna riikkaviidosaš ovttasdoaibmanprošeavttaide. 66,7 miljovnna juolluduvvo dál.

Reastaruhta juolluduvvo maŋŋelis dán jagi. 111 prošeavtta davvin gitta máttás ožžot dál doarjagiid.  300 gieldda leat dás mielde – maiddái fylkkarasttideaddji.
Lea hui stuora beroštupmi dán doarjjaortnegii, ja ollu ohcamušat leat juo boahtán.

- Dát čájeha hui čielgasit ahte ovttasdoaibmanođastussii lea stuora beroštupmi, ja ahte arvat ollugat oaivvildit ahte dat lea sihke riekta ja dárbbašlaš, dadjá Strøm-Erichsen ja Navarsete.

Ovttasdoaibmanođastus galgá veahkehit dearvvašvuođasuorggi dustet hástalusaid mat šaddet go olbmot dán áiggi ellet guhkit go ovdal Norggas, mii iešalddis lea buorre. Go vuorasolbmot lassánit sakka, de dát mielddisbuktá ođđa čuolmmaid ja hástalusaid dearvvašvuođabálvalussii.
 
- Mii sáhttit sihkkarastit nanu dearvvašvuođabálvalusa buohkaide jos mis leat bálvalusat mat eastadit buozalmasvuođaid, mat fuomášit dávddaid, ja nu váikkuhit ahte olbmot hárvvibut šaddet buohccevissui. Dáinna ruhtaortnegiin mii álggahat ovttasdoaibman doaimmaid. Doarjagat galget lassánit jagis jahkái ja dát lea duođaštussan ja boađus dearvvašvuođasuorggi juridihkalaš- ja organisašuvdnarievdadus buoridanbarggus,  dadjaba dearvvašvuođa- ja fuolahusministtar ja gielda- ja guovloministtar.

Strøm-Erichsen ja Navarsete deattuheaba ahte ovttasdoaibmanođastus lea sihke luohttámuš duođaštus ja hástalus Norgga gielddaide.

- Lea illudahtti vásihit ahte gielddat váldet vuostá dáid hástalusaid.  Mii leat viisásat ahte gielddat millosit čájehit ahte sii ánssášit dán luohttámuša, lohkaba dát guokte stáhtaráđi.