Boazodoallu: Ođđa boazodoalloláhka

Boazodoallu: Ođđa boazodoalloláhka doaibmagoahtá 1.beaivvi suoidnemánus 2007.

- Ođđa láhka lea arvat buoret veahkkeneavvu go dálá láhka dan ektui ahte nagodit oažžut boazodoalu šaddat nanu, guoddilis ealáhussan, mas boazolohku lea heivehuvvon guohtoneatnamiid gierdanrájiide, lohká eanandoallo- ja biebmoministtar Terje Riis-Johansen. - Dát lea boazoealáhussii mearkabeaivi, danin go ealáhus lea guhká vuordán ođđa ja buoret lága. Ráđđehus lea vuoruhan dán barggu, ja duosttan roahkka dadjat ahte mii leat bures bargan dáinna áššiin, lohká Riis-Johansen.

• Diehtočálus ođđa lága birra
• Geassemánu 15. beaivvi 2007 Boazodoalloáhka

Stuoradiggi dohkkehii ođđa boazodoallolága geassemánu 7. beaivvi 2007. Gonagas stáhtaráđis dohkkehii lága geassemánu 15. beaivvi 2007. Seammás mearriduvvui ahte láhka galgá biddjojuvvot fápmui suoidnemánu 1. beaivvi 2007. Dát mearkkaša ahte geassemánu 9. beaivvi 1978 boazodoalloláhka biddjojuvvo eret fámus seamma beaivvi.

Lea ráhkaduvvon diehtočálus mas muitaluvvojit deháleamos rievdadusat ođđa lágas. Dás čilgejuvvo maiddái movt boazodoallu galgá bargat ođđa lága oktavuođas.

Čavččabeallái lasihuvvojit dárkileappot dieđut dan diehtojuohkimii mii dál lea ráhkaduvvon. Dasto bohtet sihke čálalaš dieđut ja lágiduvvojit maid diehtojuohkinčoahkkimat.

Boazodoallu: Ođđa boazodoalláhka doaibmagoahtá suoidnemánu 1. beaivvi 2007.