Gielddat ožžot eambbo sisaboađuid boahtte jagi

Gielddat ožžot gaskal njeallje ja vihtta miljárdda ruvnno eanet sisaboađuid boahtte jagi. – Vaikko leat fuonit ekonomalaš áiggit de vuoruha ráđđehus eambbo ruđaid gielddaide sihkkarastin dihtii buriid čálgobálvalusaid, cealká gieldaministtar Liv Signe Navarsete.

Gaskal 2,5 ja 3,0 miljárdda lassáneamis leat friddja dahje merkekeahtes ruđat.

- Ráđđehus háliida addit gielddaide vejolašvuođa fállat buriid, dorvvolaš mánáidgárddiid, dakkár skuvlafálaldaga mii addá mánáide buori vuođu oppa eallimii ja buori divššu ja fuola boarrásiidda, dadjá gieldaministtar.

Buohkanas ekonomalaš lážáldat gielddasuorgái jahká 2011 dahká ahte gielddat nákcejit joatkit gielddalaš bálvalusfálaldaga buorideami. Gielddasuorggi golut lassánit álbmoga stuorruma geažil ja álbmoga čoahkádusa nuppástuvvama geažil. Dáid lassegoluid gokčá buohkanas sisaboađuid lassáneapmi.

Sisaboađuid lassáneapmi jahkái 2011 boahtá dan lassin ahte rukses-ruoná ráđđehus lea fuolahan gielddaide 41 miljárdda ruvdnosaš sisaboahtolassáneami áigodagas 2006-2010.

Boahtte jagi ráđđehus bidjá daid ruđaid mat leat merkejuvvon mánáidgárddiide doarjjan, rámmadoarjagii mii juolluduvvo gielddaide.

- Dat mearkkaša ahte sullii 80 proseantta gielddaid sisaboađuin leat friddja sisaboađut ja dušše njeallje proseantta ruđain leat merkejuvvon dihto geavahussii. Mii nannet báikkálaš iešmearrideami nu ahte várrejuvvon dahje merkejuvvon ruđaid oassi lea historjjálaččat vuollegis dásis. Dát addá buori vuođu heivehallat čálgofálaldaga báikkálaš diliide ja dat addá gielddaide friddjavuođa vuoruhit dan mii sin mielas lea deháleamos ássiidasaset, dadjá Navarsete.

Reastan gielddaid sisaboađuin báhcet iešosiid ja divadiid sisaboađut.

• Jagi 2011gieldaproposišuvdna.

Gielda- ja guovlodepartemeantta preassatelefovdna: 22 24 25 00.