Riekti bivdit ábis Finnmárkku olggobealde

- Dehálaš bargu lea dál loahpahuvvon. Lean vissis dasa ahte árvalus mielddisbuktá máhtu ja konstruktiivvalaš digaštallama, dajai guolástus- ja riddoministtar. 

Lávdegotti jođiheaddji Carsten Smith geigii álbmotčoahkkimis Deatnodagas guolástusministarii lávdegotti evttohusa NÁČ 2008:5  - Riekti guolástit ábis Finnmárkku olggobealde. 

– Proseassa ovddasguvlui lea maiddái dehálaš. Árvalus farggamusat sáddejuvvo viiddis gulaskuddamii. Buohkat geaidda guoská ja buot berošteaddjit galget dál váikkuhit dasa ahte oažžut konstruktiivvalaš ja buori digaštallama gažaldagain maid lávdegoddi ságaškuššá, jotkkii guolástus- ja riddoministtar. 

Stáhtaráđđi nammadii Finnmárkku Riddoguolástanlávdegoddi stáhtaráđis geassemánu 30.b. 2006:as ja lea čuovvoleapmi Stuoradikki ávžžuhusas guorahallat sámiid ja earáid rivttiid guolástit ábis Finnmárkku olggobealde. Lávdegotti mandáhtas deattuhuvvo, ahte lávdegoddi, prinsihpalaš vuođul, galgá guorahallat mearraguollebivddu vuoigatvuođadili riddolagas mearas ja vuonain Finnmárkku rittus. Lávdegoddi galgá ovdanbuktit historjjálaš geahčadeami ja čielggadeami dakkár guolásteamis, ja digaštallat dehálaš álbmotrievttálaš gálduid, norgga rievtti, ovdalaš guorahallamiid, riektegeavahusaid, vieruiduvvan vuoigatvuođaid jnv.  

Lávdegotti lea sihtan ovddidit evttohusaid vejolaš láhkarievdadusaide ja eará doaibmabijuide mat lávdegotti mielas leat dárbbašlaččat dahje ulbmillaččat. 

Lávdegotti evttohus – NÁČ 2008:5 Riekti guolástit ábis Finnmárkku olggobealde galgá sáddejuvvot gulaskuddamii, ovdal go ráđđehus árvvoštallá evttohusaid maid riddoguolástuslávdegoddi lea ovddidan. 

NÁČ 2008: 5 Finnmárkku Riddoguolástanlávdegotti čielggadeami váldosárgosat(PDF-format)

Gulahallanolmmoš, Dutkan- ja ođđahutkanossodat: seniorráđđeaddi Richard L. Pedersen, telefovdna:22 24 64 96.