Loahpaha riddodivada

Ráđđehus árvala 2013 bušeahtas heaittihit riddodivada. Ealáhussii dát mearkkaša 32,9 miljovnna ruvnno divatgeahpideami. 2013 rájes stáhta ollásit máksá goluid doaimmaide mat gusket fanasjohtolahkii, doaimmahit ja áimmahuššat čuovgadoartnaid, fanasjohtolaga mearkkaid ja eará navigašuvdnaveahkeneavvuid.

Ráđđehus árvala lasihit stáhtalaš netto juolludeami Nationála Fievrridanplána čuovvoleami  riddosuorggis 141 miljovnna ruvnnuin.

– Áŋgiruššamis mearalaš infrastruktuvrra ja geahpideames goluid váikkuha nannemis mearrafievrrideami gilvocoavcci, dadjá guolástus- ja riddoministtar Lisbeth Berg-Hansen.

2010-2019 Nationála fievrridanplána almmuha ahte lea áigumuš garrasit vuoruhit mearrafievrrideami dán logijagi áigodagas. 2013 vuosttaš bušeahttaárvalusain lea NTP 2010-2019 vuosttaš njealji jagi čuovvolangráda 99,3 proseanta.

Ráđđehus árvala lasihit juolludeami 19,2 miljovnna ruvnnuin navigašuvdnaráhkkanusaid áimmahuššamii, doarjja suohkaniid guolástanhápmaniid huksemiidda árvaluvvo lasihuvvot 21,5 miljovnna ruvnnuin, juolludeapmi BarentsWatch diehtojuohkinvuogádahkii árvaluvvo lasihuvvon 16 miljovnna ruvnnuin, ja juolludeapmi riddohálddašeapmái, plána ja analiisii Riddodoaimmahagas ja Guolástus- ja riddodepartemeantas árvaluvvo lasihuvvon oktiibuot 17 miljovnna ruvnnuin. Juolludeapmi fatnasiidda árvaluvvo lassánit 9,4 miljovnna ruvnnuin Riddodoaimmahaga ođasmahttinplána čuovvoleapmái.

Nationála Fievrridanplána rámmaid siskkobealde galgá ráhkaduvvot sierra lagasfanasstrategiija duohtandahkamis áigumuša ahte sirdit gálvofievrrideami luottas fatnasiidda. Ráđđehus árvala rádjet 25 miljovnna ruvnno 2013 stáhtabušeahtas lagasfanasjohtolatstrategiija čuovvoleapmái.