Girkonjárgga-julggaštus Barentsguovllu ovttasbarggus ođasmahttojuvvo

Jagi 2013:s lea 20 jagi vássán dan rájes go Girkonjárgga-julggaštus Barentsguovllu ovttasbarggu oktavuođas vuolláičállojuvvui. Julggaštusa ođasmahttin bargu “Girkonjárgga II-julggaštus” lea álggahuvvon.

Barentsráđđi áigu jagi 2013 ávvudit ahte 20 jagi leat vássán dan rájes go Girkonjárgga-julggaštus vuolláičállojuvvui.  Dán oktavuođas lea álggahuvvon bargu ođasmahttit 1993 julggaštusa.  Dán oktavuođas lea maid dárbu árvvoštallat ovttasbarggu bohtosiid, geahčadit hástalusaid ja mearridit perspektiivvaid ja vejolašvuođaid viidáset bargui.

Girkonjárgga-julggaštus hábmejuvvui jagiid 1992/93, ja barggu álggahii dalle eahpeformálalaš bargojoavku Norgga Olgoriikadepartemeanttas.   Bargojoavku ráhkadii, eahpeformálalaš lagas ovttasbargguin  regiovnna guoskevaš riikkaiguin, árvalusaid ja jurdagiid  julggaštusa formálalaš digaštallamiidda.  Nugo dalle 1992/1993:s, de lea dál ge nammaduvvon eahpeformálalaš bargojoavku Norgga OD:s.  Seniorráđđeaddi Sverre Jervell jođiha dán bargojoavkku mii galgá lahkalagaid bargat ovttasráđiid Barentsguovllu riikkaiguin ja eará guoskevaš oasálaččaiguin.   

Bargojoavku áigu jagi 2012 čavčča mielde sáddet árvalusaid ja ávžžuhusaid Barentsráđi Norgga jođihangoddái.  Julggaštusa ođasmahttin barggus sáhttet de Barentsovttasbarggu oasálaččat maŋŋil geavahit árvalusaid ja ávžžuhusaid vejolaš formálalaš ráđđádallanproseassas.   

Eahpeformálalaš bargojoavku háliida áinnas ođđa jurdagiid ja árvalusaid.  Árvalusaid ja oaiviliid sáhttá sáddet: Kirkenes-II@mfa.no.