ON:a álgoálbmogiid bissovaš fora

Álgoálbmogiid bissovaš fora (Fora) lea rávvejeaddji ja heivehalli orgána ON:a álgoálbmot­áššiid várás. Fora mearridedje ásahit jagi 2001 Ecosoc vuollásaš rávvejeaddji orgánan, ja das lei vuosttamuš čoahkkin miessemánus 2002. Fora ásaheapmi lei deháleamos dáhpáhus vuosttas álgoalbmotlogijagis (1994-2004). 

Fora geažil leat stáhtalaš ja stáhta olggobeallasaš áirasat vuosttamuš geardde ožžon ovtta­dássásaš searvanárvvu ON:a vuogádahkii gullevaš bissovaš ovddasteaddji orgánii.  Foras leat 16 áirasa, ja dain leat ráđđehusat nammadan 8 áirasa, ja 8 áirasa ovddastit álgoálbmogiid, geaid Ecosoca presideanta lea nammadan viiddis gulahallamiid vuođul álgoálbmot­organisašuvnnaiguin. Fora lea vuos ja ovddimusat rávvejeaddji ja heivehalli orgána ON:a álgoálbmotáššiin, ja dan jođihii vuosttamuš áigodaga ovddeš sámediggepresideanta Ole Henrik Magga. Dál lea Victoria Tauli-Corpuz, guhte lea Filipiinnain eret, váldán badjelasas jođiheaddji barggu. Álgoálbmogat leat dainna forain ožžon institušuvnnalaš mekanismma ja deaivvadansaji ON:a vuogádahkii vai sáhttet ovddidit iežaset vuoigatvuođaid. Foras leat guhtta mandáhtasuorggi; kultuvra, oahpahus, olmmošvuoigatvuođat, ekonomalaš ja sosiála ovdáneapmi, biras ja dearvvasvuohta. Ovdal gulai Fora Olmmošvuoigatvuođakommišuvnna vuollái, muhto dál Desa (Department of Economic and Social Affairs) oktiilágida Fora. Desa lea oktiilágideaddji  (koordináhtor)  maiddái nuppige álgoálbmotlogijagi. 

Fora njealját čoahkkin dollojuvvui  New York gávpogis  miessemánu 16. beaivvis 27. beaivái jagi 2005.  Dán čoahkkimis ledje Duhátjahkeulbmilat ja álgoálbmogat fáddán, ja erenoamážit čalmmustahtte dan mo geahpedit surgatlaš geafivuođa ja addit vejolašvuođa vuođđoskuvla vázzit. Dasa serve badjel duhát áirasa, guđet bohte iešguđetlágan álgoálbmotorganisa­šuvnnain, miellahttoriikkain ja ON-organisašuvnnain. Dán čoahkkima rávvagat gullet oassin doaibmaplánii mii lea nuppi álgoálbmotlogijagi várás.