40 miljovnna kulturskuvllaide ja kulturdoaimmaide

Máhttoministtar Kristin Halvorsen ja kulturministtar Anniken Huitfeldt áŋgiruššaba vai eambbosat ožžot kulturskuvla fálaldagaid, ja ahte kulturskuvla kvalitehta šattašii ain buoret. Kulturskuvllat, gielddat ja kulturberošteaddjit leat ohcan ruhtadoarjagiid báikkálaš prošeavttaide maidda lea juolluduvvon oktiibuot 40 miljovnna kruvnnu.

- Badjelaš 400 ohcamuša miehtá riikka čájehit ahte lea stuora beroštupmi báikkálaš čadnon kultuvrii, mánáide ja mánáiguin, nuoraide ja nuoraiguin, muitala máhttoministtar Kristin Halvorsen.

- Lea movttidahtti go lea ná stuora beroštupmi.  Doarjagat leat juolluduvvon viidát ja buot riikka fylkkat leat ovddastuvvon, lohká kulturministtar Anniken Huitfeldt.

Ruhtadoarjagat galget geavahuvvot modealla geahččaleapmái gos gielddat, organisašuvnnat ja ásahusat ovttasbarget lágidit máŋggabealat kulturskuvlafálaldagaid ja ovddidit iešguđet lágan prošeavttaid.  

- Eanaš ohcamušat leat ovttasbargoprošeavttat gaskal kulturskuvllaid ja SFO. Dát mielddisbuktá girjás ja gelddolaš skuvlaastoáiggi, dadjá Halvorsen.

Oahpahusdirektoráhta lea maiddái válljen moadde prošeavtta dainna oaiviliin ahte prošeavttain sáhttá leat našunála sirdinárvu. Dás deattuhuvvo ráhkadit modeallaid sihke smávit ja stuorit gielddaide.  Dakkár ovdamearkkat leat:

• Riikkaidgaskasaš kultur- ja resursaguovddáš ovttas dorvoohcciid vuostáiváldinbáikkiiguin, rávisolbmuid oahpahusain, skuvllaiguin, mánáidgárddiiguin ja eaktodáhtolaš organisašuvnnaiguin dainna ulbmilin ahte ovddidit ođđa oahpahusfálaldagaid ja heivehuvvon doaibmaarenaid mat attášedje eambbosiidda fálaldagaid ja  máŋggakultuvrralaš sisdoalu. 
• Ovttasbargoprošeavttat kulturskuvllaid ja SFO/skuvllaid gaskka man sisdoallu lea visuála dáidda, musihkka, teáhter ja dánsa.
• Ovttasbargu gaskal kulturskuvllaid ja ee. Norgga filbmaskuvlla dainna ulbmilin ahte musihkka, dánsa, dráma ja visuála dáiddafágaid kulturskuvla oahppit sáhttet bargat filmmain fuomášumi dásis filbmabuvttadeapmái.
• Sierra heivehuvvon fálaldagat mánáide ja nuoraide geainna leat psykalaš váttisvuođat, gos visuála dáidagis geavahuvvo metodan dáidda- ja ovdanbuktinterapiija, erenoamážit animašuvdna.   

 Dáppe gávnnat dieđuid makkár skuvllat ja doaimmat leat ožžon doarjagiid (.pdf)