50 mill. kruvnnu ođđa ortnegii buhtadit lassiárvodivvaga valáštallanrusttegiid huksehusain

Ráđđehus lea odne Stuoradiggái evttohan juolludit 50 mill. kruvnnu jahkái 2010 ođđa rámmastivrejuvvon ortnega bokte mii galgá buhtadit lassiárvodivvaga valáštallanrusttegiid huksehusain.

- Valáštallanrusttegiid huksen lea stuorra ekonomalaš noađđin ollu servviide ja organisašuvnnaide.  Ráđđehus háliida ahte dát ođđa ortnet álkidivččii rusttegiid  ruhtadeami ja movttiidahtášii joatkit eanet huksendoaimmaid, dadjá stáhtaráđđi Anniken Huitfeldt. 

Valáštallanrusttegat leat dehálačča vai valáštallansearvvit sáhttet fállat mánáide ja nuoraide buriid ja máŋggašlájat fálaldagaid. Dat ahte valáštallanrusttegat gávdnojit movttidahttá juohkehačča rumašlaš lihkadeapmái, lohká stáhtaráđđi Huitfeldt.

Ohcamuš sáddejuvvo dán ođđa rámmastivrejuvvon ortnegii ja buhtadeamit juolluduvvojit rámma siskkobealde maid Stuoradiggi mearrida jahkásaččat.  Jos doarjja ii govčča buot buhtademiid, de unniduvvojit juolludeamit buot dohkkehuvvon ohcciide seammá proseanttain.

Ortnet gusto buohkaide geat devdet gáibádusaid oažžut speallanruđaid valáštallanrusttegiidda, earret gielddat/fylkkagielddat ja gielddalaš fitnodagat.  Ovdal go ohcá buhtadusa, de ferte sáddet dohkkehuvvon speallanruhtaohcamuša.  Ortnet gusto valáštallanrusttet bargguide mat leat álggahuvvon maŋŋil ođđajagimánu 1. beaivvi 2010.  Huksehus galgá gárvvis ja revisoradohkkehuvvon rehketdoallu galgá sáddejuvvon ovdal go buhtadusohcan sáddejuvvo.  Rusttegiidda maidda lea vuoigatvuohta oažžut speallanruhta doarjaga lea vejolaš ohcat lassiárvodivvaga buhtadusa.

Kulturdepartemeanta áigu dán ortnegii mearridit lassi njuolggadusaid, dás maiddái ohcanáigemeari jahkái 2010. Ortnega hálddaša Lotteri- og stiftelsessystemet, gos Lotterinemnda lea váidalusásahus.