Paraolympialaš gudnebálkkašupmi Nils Erik Ulsetii

Ráđđehusa paraolympialaš gudnebálkkašumi jagi 2010 oaččui čuoigi ja báhččičuoigi Nils Erik Ulset. Kulturministtar Anniken Huitfeldt geigii bálkkašumi Norgga Olympialaš gilvvuid ja Paraolympialaš oasseváldiid feasttas lávvardaga cuoŋománu 17. beaivvi 2010.  

Nils Erik Ulset ovddasta máŋga paraolympialaš valaštallasuorggi main leat oassálastit máŋgga riikkas ja main lea garra gilvu. Máŋga jagi son lea leamaš buoremusaid searvvis čuoigamis ja báhčinčuoigamis. Ulset searvvai jagi 2010 iežas goalmmát paraolympialaš gilvvuide ja vuittii golli ja silbba báhčinčuoigamis, silbba 20 kilomehtera čuoigamis ja bronssa sáttačuoigamis.

Jury dahje árvvoštallangoddi oaivvilda ahte Nils Erik Ulset lea doaibman Norgga oassálastiid, valaštallama ja Norgga erenoamáš buorrin ovddasteaddjin ja rollamállen.

Paraolympialaš gudnebálkkašupmi juhkkojuvvo dakkár valaštalliide guđet leat erenoamáš bures gilvvohallan ja buoremusaid logus leamaš Paraolympics nammasaš gilvvuin. Árvvoštallamisttis lea jury deattuhan dehálažžan galládin valaštalli lea šaddan, makkár kvalitehta su olahusain lea ja mo valaštalli lea doaibman rollamállen. Jagi 2010 jurys lei valaštallanpresideanta Tove Paule, Paralympics oassálastiid jođiheaddji Cato Zahl-Pedersen ja Kulturdepartemeantta ossodatdirektevra Ole Fredriksen.

Bálkkašupmi juhkkojuvvui vuosttas gearddi jagi 2002. Dalle oaččui jiekŋasoabbu Ragnhild Myklebust bálkkašumi. Jagi 2006 bálkkašumi oaččui paraolympialaš gielkáhockeyjoavku ja jagi 2008 bálkkašupmi addojuvvui vuoddjái Cecilie Drabsch Norlandii.