Historisk arkiv

Presseinformasjon

Statssekretær Holte til Sør-Afrika

Historisk arkiv

Publisert under: Regjeringen Solberg

Utgjevar: Utenriksdepartementet

Statssekretær Jens Frølich Holte vitjar Sør-Afrika frå 4.-9. november. I tillegg til politiske samtalar vil Holte mellom anna delta på Africa Investment Forum i Johannesburg og Africa Oil Week i Cape Town.

- Sør-Afrika er eit land som Noreg har lange tradisjonar for samarbeid med. Landet er også ein regional og internasjonal aktør som spiller ei viktig rolle innafor mange prioriterte område av norsk utviklingspolitikk, seier statssekretær Jens Frølich Holte.

Under opphaldet vil Holte ha ei rekke møte med representantar for styresmaktene i Sør-Afrika, sivilt samfunn og partnarar.

Africa Oil Week reknast som ei av dei viktigaste næringslivsarrangementa i Afrika og samlar om lag 1300 deltakarar. Holte skal mellom anna presentere det norske bistandsprogrammet Olje for utvikling. Gjennom programmet gir Noreg råd og støtte til forvaltning av oljeressursar og oljeinntekter i fleire afrikanske land.

Africa Investment Forum vert arrangert av Afrikabanken for å auke investeringane i privat sektor i Afrika. Ambisjonane er å skape ein møteplass mellom styresmakter, investorar og gode prosjekt som treng finansiering. Holte vil halde innlegg om det norskstøtta programmet Compact with Africa, som skal trekke private investeringar til det afrikanske kontinentet, samt om klimafinansiering.