Svar på skriftleg spørsmål om kyllingproduksjon

Svar på skriftleg spørsmål nr 1651 frå stortingsrepresentant Nils Kristen Sandtrøen

Stortingsrepresentant Nils Kristen Sandtrøen har stilt følgjande spørsmål:

"Hvordan har den geografiske fordelingen av kyllingproduksjonen blitt påvirket av fordoblingen av konsesjonsgrensen i 2014, og kan statsråden gi en oversikt over totalt antall kyllingprodusenter i de enkelte årene fra 2000 til 2018 som også viser hvordan antallet kyllingprodusenter har utviklet seg i ulike fylker, og hvordan det totale antallet slaktekyllinger har utviklet seg i hvert fylke?

Kyllingproduksjon har aldri vore nokon distriktsproduksjon i Noreg. Det er fylka Østfold, Hedmark, Rogaland og Trøndelag som har stått for det meste av produksjonen. Grunnar til det kan vere produsentmiljø og avstand til kyllingslakteri. Totalt har det i perioden sidan år 2000 vore 5-600 produsentar. I den grad ein kan seie noko om endringar i den geografiske fordelinga, har det sidan 2001 vore ei viss relativ auke i produksjonen i Trøndelag (Nord-Trøndelag) og noko i Rogaland. Frå 2014 til 2017 er det ingen registrerbar endring mellom fylka, jf. tabell 1 nedanfor. Nedgangen i produksjonen etter 2014 skuldas den store svikten som skjedde i etterspurnaden i 2015.

Statistikken som blir etterspurd, for alle fylka i perioden 2001-2017, er lagt ved som eigen tabell.

Tabell 1: Talet på produsentar og prosent av landet for utvalde fylke 2001-2017

	2 001		2 014		2 017
	Antall	%	Antall	%	Antall	%
Østfold	90	18	99	15	96	16
Hedmark	106	21	133	20	116	20
Rogaland	84	16	125	19	117	20
Sør-Trøndelag	46	9	91	14	74	12
Nord-Trøndelag	56	11	122	18	102	17
Sum	382	75	570	85	505	85
Landet	511	100	673	100	593	100

Grensa for konsesjonsfri produksjon vart auka frå 120 000 til 140 000 kylling per år i 2013, og vidare til 280 000 kylling per år i 2014. Føremålet med den siste auken var å gjere det mogleg ha kyllingproduksjon som ein heiltids husdyrproduksjon, og ikkje berre som ein til­leggs­produksjon til anna jordbruksproduksjon eller anna inntekt.

På kort sikt har det berre vore dei som har hatt ledig kapasitet i eksisterande bygningar som kunne auke sin produksjon. Normalt må ein gjennom ein byggeprosess før produksjonen kan aukast. Svikten i marknaden, som gav stor overproduksjon, kom om lag samstundes med endringa i konsesjonsgrensa. Det er grunn til å tru at dette kan ha dempa interessa for å investere i nye kyllinghus.

Med helsing

Jon Georg Dale