2 Generelt om innhaldet i direktivet

I direktivet er det fastsett felles reglar for regulering av overføring, distribusjon, forsyning og lagring av naturgass i medlemsstatane. Direktivet inneheld reglar om organisering av gassektoren og om korleis han skal verke, om tilgang til marknaden og kriterium og framgangsmåtar for tildeling av rettar til overføring, distribusjon, forsyning og lagring av naturgass. Vidare er det reglar i direktivet om oppsplitting av rekneskapane til selskap som driv minst to av verksemdene overføring, distribusjon og lagring av gass. Det er ingen krav om føring av åtskilde rekneskapar for produksjon av gass.

Direktivet inneheld reglar om korleis systema for overføring, distribusjon m.v. av gass skal drivast, medrekna reglar om at utanforståande tredjemenn skal sikrast tilgang til røyrleidningssystema på grunnlag av anten regulert eller forhandla tredjepartstilgang. Direktivet inneheld òg reglar for å kunne nekte kvalifiserte gasskjøparar tilgang til røyrleidningane av omsyn til utføring av oppgåver som er allment økonomisk viktige, og av omsyn til gassalskontraktar med betalingsplikter - såkalla «take-or-pay»-kontraktar, og dessutan påbod om at det vert skipa ei nasjonal tvisteløysingsstyresmakt for snøgg løysing av tvistar, m.a. om tilgang til røyrleidningane. I tillegg inneheld direktivet krav om at det vert skipa ei ordning for regulering.

I artikkel 23 i direktivet er det teke inn ei eiga føresegn om at naturgassføretak og kvalifiserte gasskjøparar òg skal sikrast tilgang til oppstraumsgassrøyrleidningsnett for å sikre ein konkurransedyktig indre gassmarknad. Oppstraumsgassrøyrleidningsnett er i artikkel 2 nr. 2 i direktivet definert som «enhver gassrørledning eller ethvert gassrørledningsnett som drives og/eller opprettes innenfor rammen av et olje- eller gassproduksjonsprosjekt, eller som brukes for å overføre naturgass fra ett eller flere produksjonsanlegg av denne typen, til et behandlingsanlegg, en behandlingsterminal eller en endelig ilandføringsterminal». Hovudregelen gjeld ikkje dei delane av oppstraumsrøyrleidningsnetta eller -anlegga som vert nytta til lokal drift på staden der gassen vert produsert. Føresegna inneheld òg m.a. eit påbod om at det vert skipa ei nasjonal ordning for tvisteløysing for snøgg løysing av tvistar om tilgang til oppstraumsrøyrleidningane.

Ilandføringsrøyrleidningane frå den norske kontinentalsokkelen til kontinentet vil vere eit «oppstraumsgassrøyrleidningsnett» i medhald av direktivet.