2 Nærmare om forordninga

Forordninga inneber ein prisreduksjon både på engros- og sluttbrukarnivået. For det første vert mobiltilbydarane pålagde å kutte i engrosprisane som dei krev av kvarandre for å formidle samtalar på vegner av kundar i mobilnetta til andre statar. Metoden er høgsteprisregulering, som samstundes sikrar at mobiltilbydaren får att kostnaden for å formidle gjesting i sitt nett. For å sikre at prisreduksjonen som følgjer av reguleringa, faktisk vil kome forbrukarane til gode, er det òg fastsett ein høgstepris på sluttbrukarnivå. Dette vert kalla «eurotakst».

Høgstenivået på takstar mobilselskapa imellom (engrosprisar) og høgstenivået på takstar overfor mobilkundane (sluttbrukarprisar) skal setjast gradvis ned i tidsrommet 2007 – 2009.

Forordninga legg òg vekt på open informasjon om takstar. Alle mobilkundar skal få ein gratis SMS ved kryssing av landegrenser med informasjon om prisar på mobilbruk, og mobilkundane skal få høve til å ringje gratis til eit visst nummer for å få utfyllande prisinformasjon.

Kommisjonen skal innan 18 månader rekna frå juni 2007 vurdere om reguleringa skal haldast ved lag eller ikkje, og om SMS og datatenester bør takast med i forordninga. Per i dag er ikkje desse omfatta av forordninga.

Kommisjonen skal innan 30. desember 2008 utarbeide ein rapport til Europaparlamentet og Rådet der det skal gjerast ei vurdering av om det er føremålstenleg å utvide reguleringa til òg å omfatte SMS og datatenester.

Forordninga skal opphevast etter 3 år, dvs. 30. juni 2010, men det er mogleg å lengje reguleringa dersom Kommisjonen presenterer eit nytt framlegg til regulering og Europaparlamentet og Rådet godkjenner dette.