4 millionar kroner til bygging av turnhall i Hammerfest

- Turnhallen er etterspurt og vil gi gode vilkår for idretten i regionen. Hammerfest turnforening har eit stort turnmiljø med om lag 320 aktive medlemmer, seier kulturminister Thorhild Widvey.

Basishall turn er treningshallar der det er permanent oppmontert turnutstyr og hoppegroper.

Den nye turnhallen vil ligge inntil Isbjørnhallen. Golvet i turnhallen skal vere i flukt med golvet i idrettshallen slik at det gir større brukspotensial.

I det anleggspolitiske programmet er det sett av middel til fem turnanlegg (basishallar) i programperioden 2014-2017. Søknaden frå Hammerfest kommune er anbefalt av Norges idrettsforbund og olympiske og paralympiske komité (NIF) og Norges Gymnastikk- og Turnforbund (NGTF).