Betre rovviltforvaltning
Historisk arkiv
Publisert under: Regjeringen Solberg
Utgjevar: Landbruks- og matdepartementet
Nyheit | Dato: 26.01.2021
– Vedtatte bestandsmål for rovdyr må bli akseptert og respektert. Bestandsmåla for ein del rovviltartar er i dag overoppfyllt. Vi må ha ei tydeleg soneforvaltning, der beiteprioriterte område er prioritert for beitedyr. Når vi opplever avvikling av sauehald i beiteprioriterte område på grunn rovdyrutfordringar, skaper dette konflikter, seier statssekretær Widar Skogan. Han deltek i dag på nasjonal konferanse om rovvilt, beitedyr og samfunn.
– For å halde bestandsmåla er det nødvendig med effektiv lisensfelling. Det er også trong for effektiv skadefelling, med raskt uttak av "problemindivid", seier Skogan.
Bruke dei naturlege vilkåra for matproduksjon
Statssekretær Widar Skogan meiner at vi i graslandet Noreg må bruke dei naturlege vilkåra for matproduksjon. – Da må vi ha dyr på utmarksbeite, seier Skogan, som peikar på at husdyra våre haustar fôr i fjell og utmark tilsvarande 10 prosent av det vi haustar på dyrkajorda. I kroner er det snakk om verdiar på om lag 1 milliard. – I tillegg kjem jakta, der ein reknar ein omsetnad på 2,1 milliarder kroner. Her ligg det også mykje god folkehelse, og mange kortreise og sunne middagar, seier Skogan. Det er over ½ million jegarar i Noreg.
Problem i reindrifta
Skogan trekkjer spesielt fram den store innverknaden rovviltpolitikken har på reindrifta. – 40% av Noregs areal er samisk reinbeiteområde. Vi er internasjonalt forplikta til å sikre grunnlaget for den samiske reindrifta, seier statssekretær Widar Skogan.
Store tap av rein til rovvilt er ei stor utfordring. Reindrifta i Nordland meiner det står om framtida for reindrifta i dette fylket. Dei opplever å stå ved eit vegskilje, - økonomisk, driftsmessig og kulturelt.
– Tap av rein til rovvilt er ei stor utfordring. Vi må få særskilte tiltak i reinbeitedistrikt som opplever vedvarande høge tap, seier statsssekretær Widar Skogan.