- Det skal gå raskare å få godkjent byggjeprosjekt. Likevel må vi sikre at husa våre held mål i mange år, seier kommunal- og regionalminister Sylvia Brustad. Regjeringa set i haust ned eit utval for å utvikle og betre rammevilkåra for byggjeverksemda.

Det nye lovutvalet skal ta for seg heile regelverket for bygging. Siktemålet er å få eit enklare og meir oversiktleg lovverk, enklare, raskare og meir føreseieleg byggjesaksbehandling og nye og betre verkemiddel for arealbruk.

Arbeidet med endringar i lova er alt i gang. Regjeringa vil innføre tidsfristar for kommunal saksbehandling og enklare behandling av fleire saker, og har alt vedteke endringar i føresegnene som gir enklare sentral godkjenningsordning for byggjebransjen.

- Ved større bruk av standardiserte skjema og ved hjelp av Byggsøk skal papirmengda minskast. Byggsøk er eit system for byggjesaksbehandling på internett. Det vil gi raskare og meir føreseieleg saksbehandling, og betre ressursutnytting i kommunane og næringa, seier Brustad.

- Vi må ta omsyn til tekniske løysingar, estetisk utforming, miljø og lagleg tilkomst når nye prosjekt skal utviklast, anten det gjeld nybygging eller utbetring. I statsbudsjettet for 2002 foreslår Regjeringa at Husbanken skal gi større lån til bustader med lett tilkomst og gode miljøløysingar.