Fleire elevar i vidaregåande skule får føraropplæring

Hordaland fylkeskommune får 200 000 kroner til å gjennomføre prøveprosjekt med føraropplæring ved Etne vidaregåande skule og Hjeltnes vidaregåande skule.

Åtte fylkeskommunar har søkt Kommunal- og regionaldepartementet om støtte til å gjennomføre prøveprosjekt. Elevar på vidaregåande skular med avstand til køyreskular vil få køyreopplæring ved skulen dei går på. Etne vidaregåande skule og Hjeltnes vidaregåande skule er blant skulane som er plukka ut til å gjennomføre prøveprosjekt.

Store avstandar skapar utfordringar for mange unge i Distrikts-Noreg, som vil ta førarkort. Unge er ei viktig målgruppe i distrikts- og regionalpolitikken.

- Målet med prosjektet er å gjere trafikkopplæring for distriktsungdom meir tilgjengeleg for elevane. Slik kan dei spare tid og pengar på reising til køyreskular som ligg langt unna, og få mindre fråver frå den vidaregåande skulen, seier statsråd Liv Signe Navarsete.

Seks skular gjennomførte frå 2007-2009 tilsvarande prøveprosjekt, som ein del av regjeringa si satsing på trafikktryggleik og ungdomstiltak i distrikta.

 - Resultata var så gode at me ynskjer å spreie desse erfaringane til fleire skuler og fylke. Blant anna såg me at strykprosenten til førarprøva vart lågare, og at fråværet og kostnadene i samband med reise til køyretimar gjekk ned. Dette ynskjer me å byggje vidare på, seier statsråden.

• Liste over skulane som får støtte til føraropplæring ved vidaregåande skule.

Kommunal- og regionaldepartementet sin pressetelefon: 22 24 25 00.