Førde kåra til årets nynorskkommune 2015
Historisk arkiv
Publisert under: Regjeringen Solberg
Utgjevar: Kulturdepartementet
Pressemelding | Nr: 153/15 | Dato: 11.12.2015
- Dette er ein velfortent pris. Førde er ein føregangskommune i nynorskarbeidet i Noreg. Kommunen er ein aktiv pådrivar for nynorsksatsinga, ikke berre i eigen by, men i heile regionen, seier kulturminister Thorhild Widvey.
- Vi ønskjer at denne prisen skal vere med å synleggjere det gode språkarbeidet som skjer i mange nynorskkommunar, seier kulturminister Widvey.
- Førde har fokus på språkarbeid, og har gjennom prosjektet "Nynorskbyen" knytta identiteten sin tett opp mot nynorsk språk. Kommunen har eit uttalt mål om å bli eit kraftsenter for nynorsk.
Prisen "Årets nynorskkommune" har blitt delt ut sidan 2009, og har fram til i år blitt delt ut av Kommunal- og moderniseringsdepartementet.
2015 er første året Kulturdepartementet er ansvarleg for prisen. Språkrådet har leia juryarbeidet på vegner av departementet. Prisen for neste år vil bli lyst ut våren 2016.
- Eg vil oppfordre kommunar og fylkeskommunar til å sette i gang gode tiltak på eit tidleg tidspunkt, og å delta i konkurransen når utlysinga kjem, seier Widvey.
Prisen "Årets nynorskkommune" er på 100 000 kroner.