Gjellestadskipet er mest sannsynleg frå tidleg vikingtid
Historisk arkiv
Publisert under: Regjeringen Solberg
Utgjevar: Klima- og miljødepartementet
Nyheit | Dato: 17.01.2020 | Sist oppdatert: 21.01.2020
Resultatet av undersøkingane etter utgravinga på Gjellestad er no klare. Skipet kan daterast til vikingtid og det kjem etter alt å døme frå vestlandet.
Ansvarleg statsråd for kulturminnefeltet Ola Elvestuen og riksantikvar Hanna Geiran fekk sist veke overlevert resultata av dei første undersøkingane av vikingskipfunnet på Gjellestad.
Skipet er mest sannsynleg frå tidleg vikingtid. Det kan tidlegast ha blitt bygd i år 733 e.Kr. Prøvane syner at bevart treverk i skipet er angripen av sopp og det er difor under rask og gjennomgripande nedbryting. Dette skyldast senking av grunnvasspeilet, som tillet oksygen å trenge heilt ned til kjølen av skipet.
Dendrokronologi (årringdatering) av prøven har resultert i ein fastslått maksimumsalder for skipet. Årringsmønsteret i stykket svarar til vekstmønster for eik i perioden 603-724 e.Kr.
Skipets bevaringstilstand er dårleg. Kjølprøven har blitt undersøkt, bl.a. med elektronmikroskop, og har vist at treet først har blitt utsett for erosjonsbakteriar. Desse angrepa er «snille» og treet framstår som velbevart. I nyare tid er treet blitt ramma av sopp (soft rot). Desse angrep er kraftigare. Det gjer treet sårbart for trykk og handtering.
Med dagens klimautvikling er det usikkert kor lenge Gjellestadskipet kan bevarast utan ei utgraving.
Riksantikvaren skal no gjere si vurdering av funna.
Les meir om Gjellestadskipet og funna rundt skipet her:
- Riksantikvaren: Ny viten om Gjellestadfunna
- Sjå ei digital illustrasjon av korleis funnområda kan ha sett ut i vikingtida.
- Kulturhistorisk museum: Dette vet vi om Gjellestadskipet nå
- Gjellestadskipet: Anbefaler full utgraving
- Teknologien bak funnet av Gjellestadskipet