Utanriksminister Ine Eriksen Søreide besøker Berlin 3. september

- Meir enn 10 millionar menneske har behov for humanitær hjelp i Tsjadsjøregionen. Det er naudsynt med fleire ressursar og trygg humanitær tilgang for å redde liv og verne sivilbefolkninga mot vald og overgrep. Kvinner, ungdom og barn er hardast råka. Regjeringa held fram engasjementet sitt i regionen og vil bidra med 325 millionar kroner til humanitære føremål over dei neste tre åra, seier utanriksminister Ine Eriksen Søreide.

Den kriseråka regionen omfattar det nord-austlege Nigeria, delar av Niger, Tsjad og Kamerun. Dei råka landa, ein rekke FN-organisasjonar, givarland og representantar for sivilt samfunn skal delta på konferansen. Konferansen i Berlin er ein oppfylging av høgnivåkonferansen som fann stad i Oslo i 2017 om same tema.  

- Det er viktig å sjå samanhengen mellom humanitær innsats, langvarig utviklingsinnsats, konfliktløysning og fredsbygging, slik vi gjer i regjeringa sin nye strategi for humanitær politikk. Regjeringa vil vidareføre eit høgt nivå på utviklingsbistanden til Tsjadsjøregionen og sikre eit godt samspel med den humanitære innsatsen, seier Eriksen Søreide.  

Utanriksministeren skal óg ha eit bilateralt møte med Tyskland sin utanriksminister Heiko Maas i Berlin.

- Tyskland er ein særs viktig partner for oss i Europa. Noreg og Tyskland har eit nært bilateralt forhold, og vi står saman i forsvaret av det multilaterale systemet. Eg ser fram til å møte utanriksminister Heiko Maas igjen, seier Eriksen Søreide.

For meir informasjon om konferansen, sjå konferansens heimeside https://lakechadberlin.de/

Pressekontakt (med på reisa): Kari Eken Wollebæk,
epost: kari.eken.wollebaek@mfa.no, mobil: +47 92 82 73 27