Industrihistoria blir styrkt

Regjeringa løyver ti millionar kroner meir neste år til nye tiltak for ti utvalde tekniske og industrielle kulturminne. 

Les mer om miljøvernbudsjettet 2009

- Dei tekniske og industrielle kulturminna viser historia om den industrielle revolusjonen i Noreg og har stor allmenn interesse. Vi må styrkje denne delen av kulturhistoria. Budsjettauken bidrar til at vi kan setje desse viktige kulturminna raskare i stand, seier miljø- og utviklingsminister Erik Solheim.

Neptun Sildoljefabrikk er eit av steda som får støtte til å setjas i stand. Foto: Miljøverndepartementet.

Pengane skal gå til å setje i stand ti utvalde tekniske og industrielle kulturminne, og til å sikre forvaltning, drift og vedlikehald. Ved å ta vare på slike kulturminne kan vi føre vidare kunnskap om arbeidsprosessar, teknologi og sosialhistorie. Tre anlegg peikar seg ut for ekstra innsats i 2009. Det er Kistefos-Museet i Jevnaker, Neptun Sildoljefabrikk/Norsk fiskeriindustrimuseum i Melbu og Nes Jernverksmuseum i Tvedestrand. Det er Riksantikvaren som fordeler midlane.