Klimagassutsleppa fortsett å falle i Noreg

Tala frå Statistisk sentralbyrå (SSB) viser dei endelege tala for klimagassutslepp i Noreg for 2019. Dei førebelse tala som vart publisert i juni, viste utslepp på 50,3 millionar tonn.

– Vi har no hatt nedgåande utsleppstal fire år på rad. Dette viser at regjeringa sin klimapolitikk fungerer, seier klima- og miljøminister Sveinung Rotevatn.

Det endelege utsleppstalet for Noreg i 2019 er 0,3 millionar tonn høgare enn det førebelse talet som vart publisert i juni i år. Aukinga er forårsaka av tekniske justeringar, og inneber ikkje endringar i det store biletet. Justeringa skuldast mellom anna at SSB har korrigert talgrunnlaget for HFK-gassar og luftfart. 

– Regjeringa jobbar med å få ned utsleppa i alle sektorar. Vi støttar bruken av teknologi som kan gi meir miljøvennleg transport og alternative drivstoff, vi har nyleg løyvd 2,7 milliardar kroner til fangst, transport og lagring av CO₂, og vi har ei betydeleg satsing på klimaforsking og innovasjon. I løpet av året legg regjeringa fram sin plan for korleis vi skal få klimagassutsleppa ytterlegare ned fram mot 2030, seier Rotevatn.

Utsleppa i Noreg sokk med 1,6 prosent i 2017 og 0,1 prosent i 2018. Nedgangen i 2019 skuldast i stor grad nedgang i utsleppa frå vegtrafikken. Salet av bensin og autodiesel gjekk ned, samstundes som bruken av biodrivstoff auka.

– Vi bruker mykje pengar på å støtte løysingar for null- og lågutslepp. Det gjer vi til dømes gjennom Enova, Klimasats, Noregs forskingsråd og Innovasjon Noreg. Regjeringa har nesten dobla løyvinga til Enova sidan 2013, til 3,2 milliardar i år. Regjeringa har i tillegg løyvd 2 milliardar kroner til Enova som ein del av ein grøn omstillingspakke, seier Rotevatn.