Meir ungdomsmakt i kommunane

Ni av ti kommunar har no etablert ei representasjonsordning for unge. Det er ein auke på ti prosentpoeng frå 2008.

- Det er bra at stadig fleire kommunar legg til rette for medverknad frå dei unge. Men vi er ikkje i mål før alle kommunane har etablert slike ordningar. Dei få som framleis ikkje har innført ungdomsrepresentasjon må gjere det, seier statsråd Liv Signe Navarsete.

- Eg er oppteken av at forskjellege aldersgrupper er representerte i kommunale råd og utval.  Unge kjenner unge best. Difor er det viktig at dei får medverke i saker som gjeld dei sjølve, seier Navarsete. 

På oppdrag frå Kommunal- og regionaldepartementet har Norsk Institutt for by- og regionforsking (NIBR) kartlagt politisk og administrativ organisering av kommunal verksemd. Dei har også sett nærare på organisering av tenesteproduksjonen og i kor stor grad kommunane til dømes nyttar marknadsmekanismar.

Eit generelt inntrykk er at organiseringa av kommunane er rimeleg stabil. Nokre av utviklingstrekka frå 2008 held fram:

• Kommunane tek stadig meir i bruk ulike former for innbyggjardialog. Internett og sosiale medium blir viktigare i kommunikasjonen med innbyggjarane. 
• Bruk av marknadsmekanismar held fram. Konkurranseeksponering av ulike tenesteområde er meir utbreidd.
• Kommunal sektor formaliserer i større grad tiltak for arbeidsmiljø og personaladministrasjon på alle tenesteområde.
• Tonivåmodellen er mindre utbreidd enn ved undersøkinga i 2008.
• Nær alle kommunane (95 prosent) har ordførar som arbeidar på heiltid

Lenkje til rapporten