Historisk arkiv

Meir fleksibelt SND

Historisk arkiv

Publisert under: Regjeringen Stoltenberg I

Utgjevar: Kommunal- og regionaldepartementet

Regjeringa ønskjer at Statens nærings- og distriktsutviklingsfond (SND) får større fleksibilitet til å skreddarsy finansieringsløysingar for kvart enkelt prosjekt.

Pressemelding

Nr.: 154/2001
Dato: 11.10.2001

Statsbudsjettet 2002

Meir fleksibelt SND

Regjeringa ønskjer at Statens nærings- og distriktsutviklingsfond (SND) får større fleksibilitet til å skreddarsy finansieringsløysingar for kvart enkelt prosjekt.

I statsbudsjettet gjør Regjeringa framlegg om at SND får 870 millionar kroner til bedrifts- og næringsutvikling i distrikta.

- Regjeringa tek no eit tak for å gjere SND meir fleksibel, seier kommunalminister Sylvia Brustad.

- Vi vil gi SND fridom til å vurdere om det er tilskot, risikolån, lån på særskilde vilkår eller garantiar som vil fungere best i kvart enkelt tilfelle. SND vil dermed kunne tilpasse tilbodet betre etter det bedriftene treng, og skreddarsy løysingar.

- I stortingsmeldinga om SND blir det peika på at SND må spele ei aktiv rolle med å hjelpe og følgje opp bedriftene. SND skal vere aktivt ute blant potensielle kundar for å finne prosjekt som gir framtidsretta og lønnsame bedrifter. SND skal lette risikoen for gode prosjekt. SND skal følgje opp prosjekta og gi kundane profesjonell sørvis. Ei kundeundersøking frå Møreforsking viser at bedriftene ønskjer at SND skal følgje opp nyetablerte bedrifter. Kommunal- og regionaldepartementet vil derfor overføre 4,7 millionar kroner til SND- administrasjonen til slik oppfølging, seier Brustad.

Rådgiving og rettleiing er særleg viktig for distriktsbedriftene, som i mindre grad har eit nettverk å stø seg på. Regjeringa vil derfor setje av ti millionar kroner til ei ny finansieringsordning, slik bedriftene kan kjøpe tenester frå konsulentmiljø. Ordninga rettar seg først og fremst mot mindre bedrifter og nyetablerarar.