Enklare å få førarrett for lett motorsykkel og mopedbil

Dette seier samferdsleminister Jon Georg Dale i samband med at han har bede Vegdirektoratet om å gjere framlegg om enklare høve til å få førarkort for lett motorsykkel for personar som allereie har førarkort for personbil. To ulike modellar skal høyrast, både modell med noko opplæring og teoretisk og praktisk prøve, og modell med om lag 12 timar opplæring, men utan prøve. Trafikktryggleik er høgt prioritert, og opplæringskrava skal særleg ta omsyn til risiko ved køyring med lett motorsykkel.

Det kan og bli enklare å køyre mopedbil. Det skal gjerast framlegg om at aldersgrensa for førarkort for mopedbil blir senka frå 18 til 16 år samstundes som opplæringskrava blir tilpassa den nye aldersgruppa. Dei som har førarkort for traktor skal kunne utvide til mopedbil ved å ta eit tryggleikskurs.

Vegdirektoratet vil no utarbeide detaljane i framlegga som er venta på høyring før jul. Nye reglar vil kunne vere på plass til motorsykkelsesongen neste vår.