Godkjenner nytt mediebygg ved Høgskulen i Volda

— Eg er svært glad for at mediebygget no kjem på plass ved Høgskulen i Volda. Endringane i mediebransjen har dei siste åra gått raskt. Då er det viktig at den leiande medieutdanningsinstitusjonen i landet får eit bygg som gjer det lettare for studentar og forskarar å boltre seg i desse kommunikasjonsutfordringane og moglegheitene, seier forskings- og høgare utdanningsminister Iselin Nybø (V).  

Det nye mediebygget er dimensjonert for 470 studentar og 50 tilsette. Statsbygg er byggherre, og HVO står for finansieringa av byggeprosjektet i form av husleige.

Tidlegare har hovuddelen av studie- og forskingsverksemda til HVO vore lokalisert i Ivar Aasen-bygget. Men den tekniske tilstanden på bygget står ikkje i stil med satsinga institusjonen ønskjer å gjere innan digital læring og medieutdanning. Eit nytt bygg er difor dimensjonert for moderne medieproduksjon, undervisning og forsking.

— Studentane og dei tilsette ved Høgskulen i Volda har høge ambisjonar for framtida. Då er det viktig at lokala dei skal studere og arbeide i er framtidsretta både teknologisk og miljømessig, seier statsråd Nybø (V).

Ved sidan av å vere teknologisk moderne vil bygget óg vere miljøvenleg. Samanlikna med eit referansebygg skal dette prosjektet medverke til ein reduksjon i klimagassutslepp på 30 prosent.