Regjeringa fordeler 184 millionar til desentraliserte utdanningar

– Vi treng å nå ut med utdanningstilbod og kompetansepåfyll til fleire, i fleire aldrar og ulike livssituasjonar. Vi ser at arbeidsmarknaden skrik etter kompetanse og at verksemder ikkje får tak i folka dei treng. Då må vi ha tilbod som finst der folk bur, og som er tilpassa jobb og ungar. No gir vi fleire den moglegheita, seier forskings- og høgare utdanningsminister Ola Borten Moe (Sp).

For å nå ut til fleire med utdanningstilbod det er stadig aukande behov for, har regjeringa lansert ei søknadsbasert satsing på studiesenter og desentrale og fleksible utdanningstilbod. No er søknadane ferdig behandla, og regjeringa tildeler pengane.

Studiesenter frå Agder til Finnmark får støtte

16 studiesenter får til saman 34 millionar kroner som mellom anna kan gå til drift, rekrutteringsarbeid og tilrettelegging for studentar. Av studiesentera er det Lister kompetanse, Aust-Finnmark kunnskapssenter og studiesenter RKK Ytre Helgeland som får mest pengar.

– Den nye ordninga skal bidra til at studiesentera får trygg og solid drift over tid. Det skal gje fleire og betre fleksible utdanningstilbod som er tilpassa det lokale behovet for kompetanse, seier Borten Moe.

Desse får pengar til studiesenter: 

Institusjon	Tildelt beløp kr	Fylke
Lister kompetanse AS	5 100 000	Agder
Høgskolesenteret i Kongsvinger	2 712 000	Innlandet
Tynset studie- og høgskolesenter	2 280 000	Innlandet
Kommunalt oppgavefellesskap studiesenter RKK Ytre Helgeland	3 295 000	Nordland
Regionalt kurs- og kompetansesenter for Vefsn, Gran og Hattfjelldal	1 790 000	Nordland
Vesterålen regionråd	1 500 000	Nordland
Dalane utdanningssenter	2 165 000	Rogaland
Ryfylke IKS	1 800 000	Rogaland
Campus Nord-Troms AS	1 180 000	Troms og Finnmark
Studiesenteret Midt-Troms AS	360 000	Troms og Finnmark
Øst-Finnmark kunnskapssenter	4 000 000	Troms og Finnmark
Namdal regionråd	1 170 000	Trøndelag
Prios Kompetanse AS	2 950 000	Trøndelag
INVIRO	754 975	Vestland
Næringshagen på Voss AS	1 700 000	Vestland
Utdanningssenteret på Geilo	1 254 869	Viken

150 millionar til desentraliserte utdanningstilbod

Det kom mange søknader frå fagskular, høgskular og universitet for å opprette fleire ordningar for fleksible og desentraliserte utdanningar. God geografisk spreiing, og desentraliserte studietilbod med fysiske samlingar har vorte vektlagt i arbeidet med tildelingane. Totalt 43 søknader frå 17 institusjonar får pengar til nye utdanningstilbod, og det er UiT - Noregs arktiske universitet som får klart mest. 

– Vi vil at fagskular, høgskular og universitet skal ha fleire tilbod som er tilgjengelege over heile landet. Under Solbergregjeringa har vi sett at høgskular og universitet vart slått saman og sentraliserte. Det er ei utvikling vi skal snu. No har vi prioritert å gje pengar til utdanningstilbod der det er lokale, regionale eller nasjonale behov, slik som profesjonsutdanningar, teknologi, digitalisering og grønt skifte, seier Borten Moe.

Desse får pengar til å tilby desentraliserte og fleksible studietilbod:

Institusjon	Tildelt beløp kr	Fagområde	Fylke kor studiet skal tilbys
AOF Fagskolen	2 586 910	Digitalisering	Rogaland
Fagskolen i Hordaland	6 950 000	Teknologi	Vestland
Fagskolen i Vestfold og Telemark	4 598 800	Profesjonsutdanning	Vestfold og Telemark
Folkeuniversitetets Fagskole AS	3 396 700	Digitalisering	Nordland
Høgskolen i Innlandet	2 947 008	Profesjonsutdanning	Innlandet
Høgskulen i Volda	4 000 385	Profesjonsutdanning	Møre og Romsdal
Høgskulen på Vestlandet	6 482 322	Profesjonsutdanning	Vestland
Fagskolen Kristiania	8 142 500	Teknologi	Agder
NMBU	6 171 049	Grønt skifte	Innlandet
Nord universitet	6 351 512	Teknologi	Nordland
Norges handelshøyskole	17 458 000	Digitalisering	Møre og Romsdal
NTNU	7 870 486	Digitalisering	Innlandet
Studieforbundet AOF Norge	1 747 250	Profesjonsutdanning	Nordland
UiT - Norges arktiske universitet	34 707 559	Profesjonsutdanning	Troms og Finnmark
Universitetet i Oslo	6 493 260	Profesjonsutdanning	Trøndelag
Universitetet i Sørøst-Norge	12 415 640	Grønt skifte	Trøndelag
VID vitenskapelige høgskole	17 690 327	Profesjonsutdanning	Nordland

 

Det er Direktoratet for høgare utdanning og kompetanse (HK-dir) som forvaltar ordningane.

 

Fakta om ordningane

 

Den søknadsbaserte ordninga for studiesenter er ei ny ordning.

• Studie-/utdanningssenter og liknande aktørar, einskildvis eller i samarbeid, kunne søkje på ordninga.
• Tildeling av middel føreset medfinansiering frå andre aktørar, til dømes kommunar, fylkeskommunar eller næringsliv. Dette sikrar at fleire føler eigarskap til sentera.
• Det måtte visast til samarbeid med fagskule, høgskule eller universitet.
• Pengane som blir tildelte kan mellom anna gå til drift, mobiliserings- og rekrutteringsarbeid og tilrettelegging for studentar som følgjer eit studietilbod.

 

Program for fleksibel og desentralisert utdanning

• Fagskular, høgskular og universitet kunne søke på programmet.
• Søknader som har ei desentralisert organisering med samlingar vart prioriterte.
• Fagområde der det er lokale, regionale eller nasjonale behov, slik som profesjonsutdanninger, teknologi, digitalisering og grønt skifte, vart vektlagt.