Regjeringa foreslår å løyve 43 millionar kroner på Kommunal- og regionaldepartementet sitt budsjett til satsing i Groruddalen i Oslo i 2007.

- Enkelte område i dei største byane våre har særlege miljømessige og sosiale utfordringar. Regjeringa ønskjer å bidra til å betre buforholda og levekåra i desse områda, seier kommunal- og regionalminister Åslaug Haga.

Den nye tilskotsordninga for bustad-, by- og stadutvikling skal vere med på å styrke stadidentiteten i disse områda og heve deira omdømme gjennom tiltak å betre bustadmiljøet.

- I statsbudsjettet for 2007 ønskjer Regjeringa at satsinga skal være retta mot Groruddalen, seier statsråd Åslaug Haga.

Oslo kommune og staten ved Miljøverndepartementet, Samferdselsdepartementet, Arbeids- og inkluderingsdepartementet og Kommunal- og regionaldepartementet har blitt einige om eit omfattande samarbeid for å nå måla om betre miljøforhold og levekår i Groruddalen. Medverking og profilering vil være viktig i dette arbeidet.

Husbanken skal forvalte ordninga og vil ha ei sentral rolle i gjennomføringa med Oslo kommune. Husbanken skal også kunne bruke sine ordinære verkemiddel i satsinga.