- Lov og forskrift om utbyggingsavtale trer i kraft 1. juli 2006. Dette gir kommunane og utbyggjarane tid til å førebu seg på endringa, seier kommunal- og regionalminister Åslaug Haga.

Stortinget vedtok å lovregulere utbyggingsavtaler i april 2005. Samtidig blei det avgjort at det skulle lagast ei forskrift som forbyr private bidrag til sosial infrastruktur mellom anna til skular, barnehagar og sjukeheimar.

Når kommunal- og regionalministeren no har vedteke at lova og forskrifta om utbyggingsavtale skal gjelde frå 1. juli neste år, får kommunane og utbyggjarane betre tid til omstilling. I god tid før denne datoen vil regjeringa gi ut ein rettleiar. Rettleiaren blir laga i samarbeid med kommunar og utbyggjarar og vil dreie seg om avgrensinger og tilrådinger for korleis partane bør innrette seg før og under avtaleforhandlingene. Rettleiaren vil også ta føre seg kva avtalene kan innehalde.

- Eg går ut ifrå at partane vil vere lojale mot føremålet i reglane som kjem. Eg vonar ikkje det vil gå føre seg forhandlingar som bryt med desse omsyna før reglane trer i kraft, seier Åslaug Haga.

Utbyggingsavtaler har vore i bruk i fleire tiår. Avtalene har mellom anna vore vanlege ved større utbyggingsprosjekt, omforming av byområde og som alternativ til nokre av plan- og bygningslova sine reglar om infrastruktur. I dei seinare åra har avtalene i aukande grad blitt brukt til å avtale private bidrag til store tekniske anlegg, skular, barnehagar og andre tiltak det offentlege tradisjonelt har betalt. Lov og forskrift om utbyggingsavtale vil setje klare grensar for kva avtalene kan påleggje private.

• Utbyggingsavtaler
• Om lov om endringer i plan- og bygningsloven
  (utbyggingsavtaler)

Kommunal- og regionaldepartementets pressetelefon: 22 24 25 00.