Elbil: Samferdselsministeren positiv til ti prosent elbilar innan 2020

Samferdselsminister Liv Signe Navarsete er positiv til å elektrifisere ti prosent av den norske bilparken innan 2020. Energibedriftenes Landsforening, EBL, har leia ei arbeidsgruppe som foreslår ei rekkje tiltak for å få norsk transport over på elektrisitet.

– Eg vil arbeide for at vi skal nå målet om ti prosent slik rapporten foreslår, fordi elektrifisering av transportsektoren er ein svært viktig del av arbeidet med å få ned klimagassutsleppa i Noreg, seier samferdselsminister Liv Signe Navarsete.

Gruppa som står bak rapporten, foreslår også at det blir etablert eit råd som skal evaluere og eventuelt foreslå justeringar av verkemiddel fram mot 2020.
 
- Eg kan allereie no seie at eg kjem til å opprette eit slikt råd, seier samferdselsministeren. Ressursgruppa tilrår også at det blir oppretta eit nasjonalt nettverk for elektrifisering av vegtransport, Grønn Bil Norge, som skal koordinere og drive fram endringar på nasjonal basis.

- Eg støttar dette forslaget og vil kome tilbake til korleis vi i samråd med EBL og Transnova skal få dette på plass, seier Liv Signe Navarsete. Transnova er eit statleg program som skal arbeide for ein meir miljøvenleg transportsektor i Noreg.

- Eg skal no gå nøye gjennom rapporten og alle forslaga, men eg ser allereie no at vi har eit veldig godt utgangspunkt for å halde fram med å liggje i front når det gjeld elbilar. Eg vil arbeide for at Noreg skal vere eit føretrekt testland/introduksjonsmarknad for ladbare bilar framover – og eg meiner Noreg og Norden må ta på seg ei pådrivarrolle i Europa og internasjonalt for å utvikle ein marknad og regelverk for slike bilar, seier Navarsete.  

• Lenke: Rapporten frå arbeidsgruppa
• Samferdselsminister Navarsetes innlegg ved overleveringa av rapporten

Pressekontakt:

Dag H. Nestegard
Seniorrådgjevar
Informasjonsseksjonen
SamferdselsdepartementetKontor: 22 24 81 52
Mobil: 48 17 02 09