Statsbudsjettet 2005:

490 millionar kroner til rassikring på vegnettet

Regjeringa går i budsjettforslaget for 2005 inn for at det for neste år skal brukast i alt om lag 490 millionar kroner til prosjekt og tiltak som er med på å sikre mot ras på vegnettet. Av dette beløpet er nær 185 millionar kroner løyvingar under den særlege posten ”Rassikring”, 270 millionar kroner gjeld investeringsmidlar til andre prosjekt og tiltak med rassikringsgevinst, medan det ved hjelp av bompengar vil bli nytta 35 millionar kroner til rassikring. For 2005 er det planlagt å utbetre sju rasutsette strekningar og 11 rasutsette punkt på vegnettet.

- I tillegg til å hindre ulykker er rassikring også viktig for å få bort noko av den uvissa som mange opplever fordi til dømes skoletransport dagleg må passere rasutsette strekningar. Ras og rasfare fører dessutan til dårlegare og meir upåliteleg transport for næringslivet i distrikta. Rassikring langs vegnettet er difor mange stader avgjerande for at folk og næringsliv skal ha eit trygt og tenleg transporttilbod, seier samferdselsminister Torild Skogsholm.

Større rassikrings prosjekt

Desse større rassikringsprosjekta er prioriterte i framlegget til statsbudsjett for 2005:

riksveg 43 Aunevik – Bukkesteinen i Vest-Agder
riksveg 503 Gloppedalen i Rogaland
E39 Romarheimdalen (Gammelsæter – Nipetjørn) i Hordaland. Anleggsarbeidet blir starta neste år.
riksveg 550 Syreflot – Aga i Hordaland
riksveg 55 Stedjeberget i Sogn og Fjordane, med anleggstart i 2005.
riksveg 617 Gotteberget – Kapellneset i Sogn og Fjordane, med anleggsstart i 2005.
E12 Umskaret i Nordland
E6 Bånes – Birtavarre i Troms
riksveg 91 Ura i Troms, med anleggsstart i 2005.

Innanfor løyvingane til vegføremål vil det dessutan bli nytta midlar til ei rekkje mindre rassikringstiltak, både på stamvegnettet og på andre riksvegar.