Statsrekneskapen for 2006 lagt fram

Det oljekorrigerte underskottet i statsrekneskapen er 13,4 milliardar kroner mindre enn i  nysalderinga av budsjettet, vedtatt i desember 2006. Dette kjem mellom anna av at dei faktiske skatte- og avgiftsinntektene blei 8,6 milliardar kroner høgare og andre inntekter 2,4 milliardar kroner høgare enn berekna i nysalderinga. Utgifter til dagpengar og andre utgifter under folketrygda gjekk ned 1,1 milliardar kroner, medan andre utgifter gjekk ned med 1,5 milliardar kroner.

Stortinget vedtok under handsaminga av nysalderinga av statsbudsjettet i desember 2006 at 57,4 milliardar kroner av petroleumsinntektene skulle førast til inntekt på statsbudsjettet, tilsvarande det oljekorrigerte underskottet i nysalderinga. Når det oljekorrigerte underskottet blir 44,0 milliardar kroner i rekneskapen, er dermed statsrekneskapen gjort opp med eit overskott på 13,4 milliardar kroner.

Overskottet i Statens pensjonsfond — Utland blei 353,7 milliardar kroner. Samla overskott i statsbudsjettet og Statens pensjonsfond — Utland blir med det 367,1 milliardar kroner.

Det strukturelle, oljekorrigerte underskottet for 2006 er no berekna til 56,1 milliardar kroner, om lag på linje med 4 prosent  realavkastning av Statens pensjonsfond – Utland. Dette er 6,4 milliardar kroner lågare enn berekna i nysalderinga og 9,8 milliardar kroner lågare enn i Nasjonalbudsjettet 2006. Det strukturelle, oljekorrigerte underskottet kjem fram ved at den oljekorrigerte budsjettbalansen blir korrigert for mellom anna verknaden av at konjunkturane skil seg frå det normale og for endringar i rekneskapstilhøve.

Rekneskapstala for Statens pensjonsfond — Utland viser at netto inntekter frå oljeverksemda blei 355,4 milliardar kroner. Av desse blei 57,4 milliardar kroner ført tilbake til statskassa, slik Stortinget vedtok ved nysalderinga av 2006-budsjettet. Inkludert renteinntekter og utbytte på 55,7 milliardar kroner blei overskottet i Statens pensjonsfond — Utland dermed 353,7 milliardar kroner.

Bokført verdi av kapitalen i Statens pensjonsfond — Utland auka med 392,7 milliardar kroner, frå 1 390,1 milliardar kroner per 31.12.2005 til 1 782,8 milliardar kroner per 31.12.2006. I tillegg til overskottet på 353,7 milliardar kroner er auken på 39,0 milliardar kroner i kursgevinstar m.v.

 

Hovudtal for statsrekneskapen 2006 (Tal i mill. kroner)	Saldert budsjett	Nysaldert budsjett	Rekneskap
1. Statsbudsjettet
Inntekter i alt	933 897	989 339	994 904
Inntekter frå petroleumsverksemda	348 339	381 534	376 559
Inntekter utan petroleumsverksemda	585 558	607 805	618 344
Utgifter i alt	676 753	688 792	683 528
Utgifter til petroleumsverksemda	20 400	23 615	21 182
Utgifter utan petroleumsverksemda	656 353	665 177	662 346
= Statsbudsjettet sitt oljekorrigerte overskott	-70 795	-57 372	-44 002
+ Overført frå Statens pensjonsfond – Utland	70 795	57 372	57 372
= Statsbudsjettet sitt overskott før lånetransaksjonar	0	0	13 370
2. Statens pensjonsfond – Utland
Statsbudsjettet sin netto kontantstraum frå petroleumsverksemda blir overført til Statens pensjonsfond – Utland	327 939	357 919	355 377
- Overført til statsbudsjettet	70 795	57 372	57 372
+ Renteinntekter og utbytte i fondet	59 300	49 000	55 709
= Overskott i Statens pensjonsfond – Utland	316 444	349 547	353 714
3.Samla overskott på statsbudsjettet og Statens pensjonsfond - Utland	316 444	349 547	367 084