Spørsmål nr. 208 til skriftleg besvarelse frå representanten Gjelsvik
Historisk arkiv
Publisert under: Regjeringen Solberg
Utgjevar: Finansdepartementet
Svar til Stortinget | Dato: 11.11.2019
Mottakar: Stortinget
Vår referanse: 1974448
Om Finanstilsynets budsjett korrigert
Eg viser til brev av 4. november 2019 frå Stortingets president, vedlagt følgjande spørsmål frå stortingsrepresentant Sigbjørn Gjelsvik til skriftleg svar:
"Kor store ressursar/kor mykje pengar vil Finanstilsynet i 2020 bruka på a) faktisk tilsyn med finansielle føretak, b) regelverksutvikling, jf. utkast til offentlege høyringsprosessar på finansmarknadsområdet og c) deltaking i EUs finanstilsyn, korleis har fordelinga av ressursar/utgifter på dei nemnde områda utvikla seg år for år sidan 2013, og kva er tilsvarande absolutte og relative tal for dei svenske og danske finanstilsyna i same tidsperiode?"
Svar:
Finanstilsynets utgifter vert fullt ut dekte av føretaka som er under tilsyn etter finanstilsynslova § 1 eller annan lovheimel. Finansieringa av utgiftene er heimla i finanstilsynslova § 9. Brukarbetalinga er ein funksjon av budsjetterte tilsynsutgifter same året. Finanstilsynet registrerar ressursbruk på tilsynsområde som grunnlag for den årlege utlikninga av tilsynsavgifta. Tabellen nedanfor syner tilsynet sitt utgiftsnivå for perioden 2013–2018 og budsjettert nivå for 2019, samt budsjettforslag for 2020 (tal i heile 1 000 kroner).
Utgiftspost |
2013 |
2014 |
2015 |
2016 |
2017 |
2018 |
2019 |
2020 |
Driftsutgifter post 01 |
331 914 |
337 833 |
329 952 |
338 402 |
343 496 |
365 601 |
394 400 |
419 900 |
Investeringar IT post 45 |
13 338 |
11 885 |
10 145 |
21 220 |
12 582 |
20 327 |
26 000 |
24 100 |
Mva (frå 2015 ført på kap. 1633) |
|
|
10 900 |
13 127 |
13 581 |
16 233 |
15 000 |
19 000 |
Sum |
345 252 |
349 718 |
350 998 |
372 749 |
369 658 |
402 161 |
435 400 |
463 000 |
Vekst i prosent frå året før |
|
1,28 % |
0,36 % |
5,84 % |
-0,84 % |
8,08 % |
7,63 % |
5,96 % |
Antall årsverk |
275 |
263 |
263 |
271 |
282 |
290 |
|
|
Utgifter frå 2013 til 2018 er rekneskapsførte utgifter. Tal for 2019 og 2020 er høvesvis vedtatt budsjett og forslag til budsjett. Framstillinga er ikkje justert for pris- eller lønsjusteringar.
Finanstilsynets registrering av aktivitetar er ikkje inndelt etter kategoriane som representanten etterspør, og det er difor gjort tilpassingar i talgrunnlaget tilsvarande desse kategoriane. Aktivitetane som samsvarer mest med a–c i spørsmålet, er merkte med a, b og c i tabellen. Ei slik inndeling må tolkast med varsemd då kategoriane ikkje er gjensidig ekskluderande. Det er også slik at ein del av internasjonal regelverksutvikling og -overvaking er initiert utanfor EU-/EØS-systemet, t.d. FATF, og vidare slik at regelverksutvikling ville ha vore påkrevd i Noreg, uansett form for tilknyting til EU.
Tabellen syner aktivitetar for åra 2013 til 2016. Frå 2017 endra tilsynet metodikken for å registrere aktivitetar. Registrering av tidsbruk på aktiviteter vart avvikla i 2017. Føremålet var å effektivisere administrative oppgåver i Finanstilsynet. Registrering av tidsbruk vart frå 2017 konsentrert om å få eit korrekt grunnlag for utlikning av tilsynsavgifta. Statistikk på fordeling av tilsynsaktivitetar vart då vurdert som mindre relevant. Registrering på tilsynsaktiviteter vart innført frå og med 2019.
Samanstillinga syner at andelen for kvar kategori er relativt stabil mellom 2013 og 2016. Tal for kategoriane frå 2016 kan derfor gje ein indikasjon om fordelinga i 2017-2020.
Prosent per aktivitet |
2013 |
2014 |
2015 |
2016 |
a) Stadleg og dokumentbasert tilsyn |
28,5 |
30,4 |
29,3 |
31,6 |
b) Utvikling og forenkling av regelverk |
10,4 |
7 |
8,2 |
10 |
c) Internasjonalt samarbeid |
5,9 |
6,7 |
6 |
5,8 |
Makroøkonomisk overvaking |
2,2 |
3 |
2,6 |
3 |
Forvaltning og handheving av lover og forskrifter |
20,5 |
19,8 |
20,4 |
22,2 |
Informasjon og kommunikasjon |
4,8 |
4,7 |
6 |
4,9 |
Administrasjon, leiing og org. utvikling |
27,6 |
28,3 |
27,4 |
22,5 |
Det er innhenta informasjon frå Finansinspektionen i Sverige og Finanstilsynet i Danmark om deira ressursbruk. Det norske finanstilsynet har fleire tilsynsoppgåver enn same myndigheiter i Sverige og Danmark, og det er difor ikkje mogeleg å samanlikne direkte. Det svenske og danske finanstilsynet har mellom anna ikkje tilsyn med revisjonsføretak, rekneskapsførarar, eigedomsmeklarar og inkassoføretak, slik det norske finanstilsynet har. Finanstilsynet anslår at ressursbruken på desse tilsynsområda utgjorde om lag 30 årsverk av i alt 282 årsverk ved utgangen av 2018.
Danske myndigheiter opplyste til Finanstilsynet at dei ikkje har lik inndeling, og at dei endra registreringspraksis i 2018, slik at dei etterspurte tala ikkje er tilgjengelege. Dei opplyser at tala for 2018 kan leggjast til grunn for dei andre åra. Det danske tilsynet brukte i 2018 87,1 mill. danske kroner (24,8 pst) på generell administrasjon, 228,4 mill. danske kroner (64,9 pst.) på tilsyn, 29,2 mill. danske kroner (8,3 pst.) på regulering og om lag 7 mill. danske kroner (2 pst.) på informasjon. I 2018 vart det registrert 315 årsverk i danske Finanstilsynet.
Finanstilsynet har innhenta opplysningar frå svenske Finansinspektionen. Finansinspektionen har gjeve tal for 2018 og opplyst at tilsvarande nivå gjeld for perioden 2013–2020. Svenske myndigheiter brukte 61 pst. på tilsyn med finansielle føretak, 13 pst. på regelverksutvikling og 9 pst. på deltaking i EUs finanstilsyn. Resterande 17 pst. er ikkje utdypa. Samla rekneskapsførte utgifter i 2018 var 715,2 mill. svenske kroner. I 2018 var det registrert 473 årsverk i Finansinspektionen.
Med helsing
Siv Jensen