Svar på skriftleg spørsmål om mikroplast frå kompostjord

Svar på skriftleg spørsmål nr. 2035 frå representanten Une Aina Bastholm 

Eg viser til brev frå Stortingets president av 9. august 2018, vedlagt spørsmål nr. 2035 til skriftleg svar frå stortingsrepresentant Une Aina Bastholm.

Spørsmålet er opprinneleg stilt til Klima- og miljøministeren, men blir besvart av meg.

Spørsmålet lyd slik:

"Det er stor oppmerksomhet om plastforurensing som bidrar til mikroplast. At plast og mikroplast også spres gjennom kompostjord fra kommunal avfallshåndtering er mer ukjent. Gjødselvareforskriften stiller bare krav til at organisk gjødsel ikke skal inneholde mer enn 0,5 prosent biter av plast, glass og metall som er større enn fire millimeter, men sier ikke noen som helst om mikroplast. Mener Klima- og miljøvernministeren at mikroplast fra kompostjord er et forurensingsproblem?"

Svar:

Eg er einig i at mikroplast i jord og gjødsel bør viast merksemd. Det trengs meir kunnskap basert på forsking om omfang og effektar av mikroplast i vekstmedium.

Vitskapskomiteen for mat og miljø (VKM) arbeider med ei vurdering av effektar av mikroplast på miljø og mattryggleik. Denne vil samanfatte den kunnskapen som finst og er venta å vere ferdig våren 2019. Mattilsynet har òg planar om å be VKM om ei risikovurdering av plast/mikroplast spesielt i jord- og gjødselprodukt.

Eg ynskjer å sjå resultata av desse vurderingane før eg kan uttale meg om betydinga av mikroplast frå kompostjord som forureiningskjelde.

Med helsing

Jon Georg Dale