Svar på skriftleg spørsmål om endring av talet på obduserte dyr og prisar

Stortingsrepresentant Geir Pollestad har stilt følgjande spørsmål for skriftleg svar: 

"Korleis har talet på obduserte dyr og prisane for obduksjon av dyr endra seg dei seinare åra?" 

Representanten grunngir spørsmålet med at Stortinget i samband med handsaming av Dokument 8:132 S (2014-2015) gjorde fylgjande vedtak: 

"Stortinget ber regjeringen sørge for at egenandelene ved obduserte dyr har et nivå som sikrer det antall obduksjoner som trengs for å ivareta og styrke kunnskapen om dyrehelse." 

Svar:
Eg har frå Veterinærinstituttet motteke oversikt over tal på obduserte dyr der innsendaren betaler for obduksjonen, og over prisar for obduksjon for perioden 1.1.2014 – 7.12.2016. Desse oversiktene følgjer vedlagt. 

Som det går fram av siste tabell, så har Veterinærinstituttet frå og med 1.1.2016 halvert prisen på obduksjonar av produksjonsdyr utført ved laboratoriet i Tromsø. 

Når det gjeld talet på obduserte dyr, så viser den fyrste tabellen at det er ein monaleg auke frå 2014 og 2015 til 2016 i talet på obduksjonar der innsendaren betaler, ved laboratoriet i Tromsø. Auken er ikkje tilsvarande i det samla talet på obduksjonar fordi eit forskingsprosjekt vart avslutta i 2015. Dei fleste prøvane kjem framleis frå område relativt nært Tromsø.

Med helsing 

Jon Georg Dale 

Vedlegg