Svar på skriftleg spørsmål om korleis utviklinga i bruk av beiteressursane og kraftfôr vore dei siste åra
Historisk arkiv
Publisert under: Regjeringen Solberg
Utgjevar: Landbruks- og matdepartementet
Svar til Stortinget | Dato: 01.07.2016
Mottakar: Stortinget
Dykkar referanse:
Spm 1372
Vår referanse:
16/840
Landbruks- og matminister Jon Georg Dale har svart på skriftleg spørsmål frå stortingsrepresentant Geir Pollestad (Sp) om korleis utviklinga i bruk av beiteressursane og kraftfôr til denne produksjonen har vore dei siste åra sett i samanheng med produksjonen.
Eg viser til brev av 24. juni 2016 der representanten Geir Pollestad stiller følgjande spørsmål for skriftleg svar:
"Produksjonen av kjøt frå sau er aukande. Korleis har utviklinga i bruk av beiteressursane og kraftfôr til denne produksjonen vore dei siste åra sett i samanheng med produksjonen?"
Regjeringa har ved jordbruksoppgjera gjennomførd fleire viktige tiltak for norsk sauehald. Dette har gjeve ei positiv utvikling innan norsk sauehald i dei seinare åra, og vi har oppnådd marknadsdekning med norsk vare. Produksjonen av kjøt av sau/lam var i åra 2013, 2014 og 2015 på høvesvis 23,6, 24,2 og 25,6 mill. kg.
Materiale frå Landbruksdirektoratet og søknad om det generelle beitetilskotet syner at 99 prosent av norske sau/lam går på beite, og at talet for sau/lam på beite har auka frå 2013 til 2015. Tal frå søknad om tilskot for dyr på utmarksbeite syner at ein svært stor del av norsk sau/lam også går på utmarkbeite. Ser ein på del sau/lam på utmarksbeite etter talet på sau/lam i besetninga finn ein at bruken av utmarksbeite er aukande med aukande storleik på besetninga. For søknadsomgangen 2014 søkte 73 prosent ev besetningane med 21-40 dyr på tilskot til utmarksbeite, medan tilsvarande tal for besetningar med over 301 dyr var 88 prosent. Meir informasjon om beitebruken går fram av tabellen nedanfor.
Tabell: Utviklinga i tal sau og lam på beite
År |
Sau og lam- tal for dyr på beite 12 (16) veker 1) |
Sau/lam på beite i prosent |
Sau og lam – |
Sau/lam på utmarksbeite i prosent av totalt dyretal |
20062) |
2 279 598 |
97,5 % |
|
|
2008 |
2 202 599 |
98,5 % |
1 900 171 |
86,0 % |
2013 |
2 226 261 |
98,8 % |
1 908 294 |
85,7 % |
2014 |
2 260 134 |
99,2 % |
1 945 389 |
86,5 % |
2015 |
2 343 729 |
99,1 % |
2 005 071 |
85,9 % |
1) Tal for sau/lam på beite etter søknad om det generelle beitetilskotet med krav til beitetid i 12 (16) veker
2) Fyrste år med det generelle tilskotet for beiting i 12 (16) veker.
Innanfor den korte tidsfristen for svar, har ikkje alle dei største produsentane av kraftfôr hatt moglegheit til å gje informasjon om utviklinga i sitt sal av kraftfôr til sau/lam. Den informasjonen departementet har motteke dekkjer like fullt storparten av marknaden for 2013-2015. Det er òg bønder som nyttar kraftfôr laga for storfe til fôringa av sau, men informasjon om omfanget av dette er ikkje tilgjengeleg.
Utviklinga i produksjonen av kjøt av sau/lam og i sal av kraftfôr til sau/lam, syner at forbruket av kraftfôr ikkje har auka ut over det som følgjer av veksten i produksjon av kjøt av sau/lam dei siste åra.
Med helsing
Jon Georg Dale