Tiltak for betre kollektivtransport i byområda: 980 av 1 380 millionar kroner er fordelt
Historisk arkiv
Publisert under: Regjeringen Solberg
Utgjevar: Samferdselsdepartementet
Pressemelding | Nr: 87/16 | Dato: 04.04.2016
- Regjeringa ønskjer å stimulere til betre framkome, miljø og helse i storbyområda. For mange er privatbil i dag det beste alternativet for å få kvardagen til å gå i hop. Desse må få eit betre alternativ. Vi vil auke valfridomen for dei reisande, slik at fleire vel å gå, sykle eller reise kollektivt. Midlane frå den såkalla Belønningsordninga legg til rette for dette, seier samferdselsminister Ketil Solvik-Olsen.
Dei ni største byområda i landet hadde belønningsavtalar med staten ved utløpet av 2015. Det er avtalefesta følgjande fordeling mellom desse byområda i 2016:
Oslo | 280 mill. kr |
Bergen | 140 mill. kr |
Trondheim | 170 mill. kr |
Stavanger | 60 mill. kr |
Kristiansand | 80 mill. kr |
Buskerudbyen | 80 mill. kr |
Skien/Porsgrunn | 60 mill. kr |
Fredrikstad/Sarpsborg | 50 mill. kr |
Tromsø | 60 mill. kr |
Dette utgjer alt i alt 980 millionar kroner. Desse midlane blir utbetalt på bakgrunn av om den årlege rapporteringa viser at byområda har oppfylt krava i avtalane med staten.
400 millionar kroner blir fordelt seinare i år
Samferdselsdepartementet kjem på eit seinare tidspunkt attende med fordelinga av det resterande beløpet på 400 millionar kroner.
- I statsbudsjettet for 2016 er det alt i alt løyvd 1 380 millionar kroner til Belønningsordninga. Det er ein auke på 46 prosent samanlikna med forslaget i det siste budsjettforslaget frå den førre regjeringa i 2013. Det er eit taktskifte i satsinga på kollektivtransport i byområda som regjeringa er i gang med, seier samferdselsministeren.
For fleire opplysningar – sjå:
- Temasida til Samferdselsdepartementet om Belønningsordninga for betre kollektivtransport i byområda
Oppdatert: Se også pressemelding om fordeling av 400 millioner kroner